काठमाडौँ , २ भदौ ।
नेपाली बजारमा सुनको भाउ फेरि आकाशिएको छ । एकै दिन प्रतितोला २२ सयले बढेर एक लाख चार सय कायम भएको छ ।
सोमबार बजारमा सुनको भाउ प्रतितोला ९८ हजार २ सय रुपैयाँ कायम भएकोमा आज मंगलबार २२ सयले बढेर एक लाख चार सय कायम भएको नेपाल सुनचाँदी व्यवसायी महासंघले जनाएको छ ।
त्यस्तै नेपाली बजारमा मंगलबार तेजाबी सुनको मूल्य प्रतितोला ९९ हजार ९ सय रुपैयाँ कायम भएको महासंगले जनाएको छ ।
सोमबारको तुलनामा चाँदीको मूल्य पनि प्रतितोला ६५ रुपैयाँले बढेको छ । सोमबार प्रतितोला एक हजार ३ सय ६५ रुपैयाँ कायम भएको चाँदीको मूल्य मंगलबार एक हजार ३ सय ८० रुपैयाा पुगेको छ ।
यसअघि लगातार सुनको मूल्य बढे पनि केही दिनअघि फेरि घटेको थियो । गत साउन २३ गते सुनको भाउ अहिलेसम्मकै उच्च प्रतितोला एक लाख ३ हजार ५ सय रुपैयाँ पुगेको थियो । त्यसपछि सुनको भाउ विस्तारै घट्न थालेको थियो । साउन २८ गते नेपाली बजारमा सुनको भाउ एकैदिन ६ हजार २ सय रुपैयाँले घटेको थियो ।
कोरोनाका कारण अन्तर्राष्ट्रिय बजारमा सुनको भाउमा एकरुपता नभएकोले नेपाली बजारमा त्यसको असर परेका नेपाल सुन चादीँ व्यावसाय महासंगले जनाएको छ ।
