काठमाडौं, १८ असार । अमलेखगञ्जदेखि चितवनको लोथरसम्मको पेट्रोलियम पाइप लाइनका लागि आवश्यक जग्गाको सर्वेक्षण अन्तिम चरणमा पुर्याएको नेपाल आयल निगमले जनाएकाे छ ।
गत आर्थिक वर्षमा पाइप लाइनको प्रारम्भिक सर्वेक्षण सम्पन्न गरेको निगमले अहिले जग्गाको सर्भे अन्तिम चरणमा पुर्याएको हाे । हाल पाइप लाइन तथा भण्डारण निर्माणको जग्गाको पूर्ण सर्भे भइरहेको निगमका निर्देशक वीरेन्द्र गोइतले बताए ।
जग्गा सर्भेको नक्सा तयार भएपछि भारत र नेपालको सहसचिव स्तरीय संयुक्त कार्यसमूहलाई बुझाइने उनले बताए । गोइतले पाइप लाइनको सर्भे सकिएको र जग्गाको सर्भे अन्तिम चरणमा पुगेकाले उक्त कार्य सकिएपछि डीपीआर बन्ने बताए ।
निगमका अनुसार झापाको चारआलीसम्मको पाइप लाइनको सर्भेको काम पनि सुरु हुँदै छ । जग्गाको सर्भेपछि डीपीआर निर्माणको काम अघि बढ्नेछ । भारतको मोतीहारीबाट अमलेखगञ्जसम्म सञ्चालन भएको पेट्रोलियम पाइप लाइनलाई चिवतनको लोथरसम्म विस्तार गरिने भएको हो ।
