पर्सा २२ जेठ । पर्सा जिल्लाको दुई स्थानबाट सशस्त्र प्रहरी र नेपाल प्रहरीले स्रोत नखुलेको ३२ लाख ४८ हजार रुपैया सहित दुई जनालाई पक्राउ गरी कारवाही प्रक्रिया अगाडि बढाएको छ । नेपाल भारतको सीमानाका पर्साको बंजारी गाउँबाट सशस्त्र प्रहरीले आज बिहान श्रोत नखुलेको ठूलो रकम सहित १ युवकलाई पक्राउ गरेको छ । सशस्त्र प्रहरीले पर्साको बाहुदरमाई नगरपालिका–५ भौराटारका २० वर्षीय प्रकाश साह सीमावर्ती क्षेत्र भिस्वाबाट आफ्नो गाउँ जादै गर्दा २२ लाख ४८ हजार रुपैयाँ सहित पक्राउ गरेको जनाईएको छ ।
साह सवार ना ४३ प २८०२ नम्बरको मोटरसाइकल छिपहरमाई गाउँपालिका ४ बंजारीमा सशस्त्र प्रहरीले चेकजाँच गर्दा २२ लाख ४८ हजार रुपैयाँ बरामद गरेको थियो । विशेष सूचनाको आधारमा बंजारीमा साहको मोटरसाइकल चेक गर्दा मोटसाइकलको ट्यांकीमा बनाइएको फल्स बटम भित्रबाट हजार, पाँच सय, सय र ५० का नोटहरु बरामद भएको सशस्त्र प्रहरी बोर्डर आउट पोस्ट भिस्वाका सशस्त्र प्रहरी निरीक्षक हरिकुमार पराजुलीले जानकारी दिए ।
साहले रकमको श्रोत खुलाउन नसकेकाले उनलाई रकम र मोटरसाइकलसहित नियन्त्रणमा लिइ आवश्यक कारवाहीका लागि जिल्ला प्रहरी कार्यालय पर्सामा पठाएको सशस्त्र प्रहरी निरीक्षक पराजुलीले बताए ।
त्यसैगरी पर्सा जिल्लाको सिमावर्ती गाउँ भिस्वाबाट नेपाल प्रहरीले १० लाख नगदसहित छिपहरमाई गाउँपालिका, चेरगाहा टोल निवासी लालबाबू साह कानुलाई पक्राउ गरेको छ ।
मोटरसाइकलमा सवार साहबाट स्रोत नखुलेको १० लाख नगद बरामद भएको र आवश्यक कारबाहीको लागि जिल्ल प्रहरी कार्याल्य पर्सा पठाइएको भिस्वा प्रहरी चौकीले जानकारी गराएको छ ।
