काठमाडौं १६ फागुन ।
खुमलटार युथ क्लबले सहिद स्मारक ’बी’ डिभिजन लिग फुटबलमा लगातार दोस्रो जित हासिल गरेको छ । एन्फा कम्प्लेक्स सातदोबाटोमा आज १० खेलाडीमा सिमित रानीपोखरी कर्नर टिम आरसीटीलाई ३–० गोल अन्तरले पराजित गर्दै खुमलटार लगातार दोस्रो जित निकालेको हो ।
खुमलटारको जितमा सबिन केसीले दुई गोल गरे । महेश राईले थप एक गोल गरे । खेलको २५ औं मिनेटमा महेशको गोलबाट खुमलटारले अग्रता बनाएको थियो । ३५ औं मिनेटमा सबिनले गोल गर्दै खुमलटारलाई २–० को अग्रता दिलाए ।
खेलको ३६ औं मिनेटमा कप्तान अमर डंगोलले रातो कार्ड पाएपछि आरसिटी १० खेलाडीमा समेटिएको थियो । त्यसपछि खेलको ६० औं मिनेटमा सबिनले व्यक्तिगत दोस्रो गोल गर्दै खुमलटारलाई ३–० को सहज जित दिलाए । खेलको म्यान अफ दि म्याच खुमलटारका महेश राई चुनिए ।
जितसँगै खुमलटारले २ खेलमा ३ अंक जोडेको छ । पहिलो खेलमा खुमलटारले मध्यपुर युथ एसोसियसनलाई १(० गोल अन्तरले पराजित गरेको थियो । आरसीटीले भने २ खेलमा १ अंक जोडेको छ । पहिलो खेलमा आरसीटीले झम्सिखेल युथ क्लबसँग १–१ गोलको बराबरी खेलेको थियो ।
आगामी चैत २३ गतेसम्म चल्ने लिगमा १२ क्लबले प्रतिस्पर्धा गरिरहेका छन् । एक टिम ’ए’ डिभिजन लिगमा बढुवा हुनेछ भने एक टिम ’सी’ डिभिजनमा घटुवा हुनेछ ।
