काठमाडौं, पुस २७ ।
तेस्रो संस्करणको होङ्गान्जी न्यु डाइमण्ड कप राष्ट्रिय खुला महिला भलिबल प्रतियोगिताको उपाधि भिडन्त आज हुँदै छ । नयाँ बसपार्क्स्थित ढोरपाटन भलिबल क्लबको मैदानमा हुने फाइनलमा आयोजक न्यु डायमण्ड स्पोर्ट्स क्लब र विभागीय टिम एपीएफ क्लब भिड्ने छन् ।
फाइनल खेल दिउँसो साढे १ बजे सुरु हुनेछ । दुवै टिम उपाधि जित्ने लक्ष्यसहित कोर्ट प्रवेश गर्नेछन् । गत संस्करणको उपाधि उचालेको एपीएफ यो वर्षको उपाधि पनि आफ्नो पक्षमा पार्ने दाउमा हुनेछ ।
यता, न्यु डायमण्ड गत संस्करणको फाइनलमा व्यहोरेको हारको बदला लिदै उपाधि जित्ने योजनामा हुनेछ ।यस अघि सेमिफाइनलमा न्यु डायमण्डले आर्मीलाई ३–० को सोझो सेटमा हराएको थियो । एपीएफले पुलिसलाई ३(० कै सोझो सेटमा हराएको थियो ।
यस्तै तेस्रो स्थानको लागि पुलिस र आर्मीबीच ११ बजे खेल हुनेछ ।प्रतियोगिताको विजेताले ४ लाख १ हजार १ रुपैयाँ, दोस्रो हुने टोलीले ३ लाख १ हजार १ सय रुपैयाँ प्राप्त गर्नेछ ।
