काठमाडौं, पुस २६ ।
राजधानीमा जारी सहिद स्मारक ए डिभिजन लिगमा आज छैटौं चरणका खेलहरु शनिबारदेखि सुरु हुँदै छ । छैटौं चरणको पहिलो दिन आज २ वटा खेल हुने छन् ।
पहिलो खेलमा जावलाखेल युथ क्लब र मछिन्द्र आमने सामने हुने छन् । यो खेल मध्याह्न १२ बजेदेखि सुरु हुने छ । यी दुवै टिम अपराजित छन् ।आजको खेलमा मछिन्द्र विजयी भए केहीबेरका लागि शीर्ष स्थानमा उक्लने छ भने जावलाखेल विजयी भए दोस्रो स्थानमा पुग्नेछ ।
दोस्रो खेलमा अपरान्ह ३ बजे दोस्रो स्थानको मनाङ मर्स्याङ्दी र हिमालयन शेर्पा आमने सामने हुने छन् । दुवै खेल त्रिपुरेश्वर स्थित दशरथ रंगशालामा हुने । मनाङ विजयी हुँदै शीर्ष स्थानमा पुग्ने लक्ष्यमा रहँदा शेर्पा भने पहिलो जित निकाल्दै तीन अंकको खोजिमा हुने छ ।
मंगलबारको झडपमा संलग्न खेलाडी कारबाहीमा परेपछि मछिन्द्र र मनाङ समस्यामा छन् । तर दुवै टिमलाई जित निकाल्दै लिग तालिकाको शीर्ष स्थानमा उक्लिने अवसर छ ।
