काठमाडौं, पुस २१ । सहिद स्मारक ‘ए’ डिभिजन लिग फुटबलका सोमबार भएका दुवै खेलहरु बराबरीमा सकिएका छन् ।
दशरथ रंगशालामा भएका पाँचौं चरणका खेलमा मनाङ–मर्स्याङ्दी क्लबले मच्छिन्द्र क्लबसित तथा जावलाखेल युथ क्लबले न्यूरोड टिम ९एनआरटी०सित बराबरी खेलेको हो । मनाङ र मच्छिन्द्रबीचको खेल २–२ गोलको बराबरीमा सकियोे । खेलको दोस्रो मिनेटमै फेमीको गोलबाट मनाङले अग्रता लिएकामा सुजल श्रेष्ठले ४६औं मिनेटमा गोल गर्दै मच्छिन्द्रलाई बराबरीमा ल्याएका थिए ।
८१औं मिनेटमा सोमिदेको गोलबाट मच्छिन्द्रले २–१ ले अग्रता लियो । तर, ८८औं मिनेटमा विमल रानाले गोल गर्दै मनाङलाई बराबरीमा ल्याएका थिए । खेल सकिएपछि मैदानमै खेलाडीहरुबीच झडप भएको थियो । भिडन्त बढ्दै गएपछि प्रहरी नै मैदानभित्र जानु परेको थियो । ‘बेन्च’मा बसेका खेलाडीहरु समेत मैदानमा छिरेर विपक्षी टोलीका खेलाडीहरुमाथि प्रहार गरेका थिए । सोक्रममा मनाङका रन्जन विष्टलाई रेफ्रीले रातो कार्ड देखाएका थिए । यो झडपले खेलाडीहरुमा अनुशासनको कमी देखाएको छ ।
मनाङ ११ अंकसहित पहिलो तथा मच्छिन्द्र १० अंकसहित दोस्रो स्थानमा छ । त्रिभुवन आर्मी क्लब र जावलाखेलको समान ९ अंक रहेको छ ।
सोमबारै दशरथ रंगशालामा भएको पहिलो खेलमा जावलाखेल र एनआरटीले गोलरहित बराबरी खेले ।
