१३ पुस, काठमाडौं । नेपाल आयल निगमले ग्यास उद्योग सञ्चालनको अनुमति लिएर पनि पीडीओ (प्रोडक्ट डेलिभरी अर्डर) नलिने ग्यास उद्योगीहरूको अनुमति रद्द गर्ने भएको छ ।
निगमले आज एक सूचना जारी गर्दै दर्ता गराएर पीडीओ नलिने उद्योगका अनुमति नै रद्द गर्ने चेतावनी दिएको हो । ग्यास उद्योगहरूले पीडीओ लिन आनाकानी गरेपछि निगमले अनुमति रद्द गर्नेसम्मको चेतावनी दिएको हो ।
ग्यास उद्योगहरूले दर्ता भएपछि नेपाल आयल निगमको विनियम अनुसार, पीडीओ लिएर उद्योग सञ्चालन गर्नुपर्छ । तर, ०७१ माघ १४ पछि एलपी ग्यासका नयाँ तथा शाखा उद्योग निर्माण गर्न निगमबाट अनुमति लिई निर्माणाधीन उद्योगहरूले अझै पनि पीडीओ लिएका छैनन् ।
नेपाल आयल निगमका प्रवक्ता वीरेन्द्र गोइतले लाइसेन्स ओगटेर बसेका कतिपय ग्यास उद्योगीले पीडीओ लिन आनाकानी गरेपछि त्यस्ता उद्योगमाथि कडाइ गर्न लागिएको जानकारी दिनुभयो । दर्तापछि पीडीओ नलिएका उद्योग लाई पीडीआ लिन ९० दिनको समय दिइएको छ ।
‘निगमको एलपी ग्यास विनियमावली २०६५ (संशोधनसहित) को विनियम ४ बमोजिम पीडीओ प्राप्त गर्न एलपी ग्यास उद्योगीहरूलाई सूचना गरेको निगमले तोकिएको ९० दिनभित्र पनि उद्योगहरूले पीडीओ नलिएमा अनुमति खारेज गर्ने उहाँले बताउनुभयो।
