चिनियाँ राष्ट्रपति सि चिनफिङसँग प्रमुख प्रतिपक्षी दल नेपाली कांग्रेसका सभापति एवं पूर्व प्रधानमन्त्री शेरबहादुर देउवाले शिष्टाचार भेटघाट गरेका छन् । सोल्टी होटलमा भएको ‘वान टु वान’ वार्तामा दुई देशबीचको सम्बन्ध, विकास निर्माणमा चिनियाँ सहयोगलगायत विषयमा छलफल भएको देउवाका स्वकीय सचिव भानु देउवाले जानकारी दिए ।
‘उहाँहरुबीच भएको औपचारिक शिष्टाचार भेटघाट हो’ देउवाले नयाँ पत्रिकासँग भने ‘दुई देशबीच रहँदै आएको सम्बन्ध र विकास निर्माणमा चीनले गरेको सहयोगको विषयमा छलफल भयो ।’
पहिला कांग्रेसका नेताहरुलाई सामुहिक भेटघाट गर्ने तयारी भए पनि नमिलेकाले ‘वान टु वान’ वार्ता भएको थियो । ‘राष्ट्रपति सिसँगको भेटवार्तामा सभापतिसहित पार्टी पदाधिकारी पनि सहभागी हुने कुरा थियो तर मिलेन । त्यसपछि सभापतिले मात्रै ‘वान टु वान’ वार्ता गर्नु भयो’ देउवाको सचिवालयले जानकारी दियाे ।