१७ भदौं, काठमाडौं । नेपाल सरकारको योजना अनुरुप गत आर्थिक वर्ष अगावै सबै स्थानीय तहहरुमा वाणिज्य बैंक खोल्ने योजना भए पनि अझै १८ स्थानीय तहहरुमा शाखा पुग्न सकेका छैनन् । नेपाल राष्ट्र बैंकका अनुसार कुल ७५३ स्थानीय तहमध्ये २०७६ असारसम्म ७३५ तहमामत्रै वाणिज्य बैंकहरुका शाखा विस्तार भएका छन् ।
बाँकी १८ स्थानीय तहहरुमा भने वाणिज्य बैंकका शाखा पुग्न नसकेको राष्ट्र बैंकले बताएको छ । भौगोलिक विकटाका कारण ती स्थानीय तहहरुमा तत्कालै शाखा खोल्न समस्या रहेको राष्ट्र बैंकको दावी छ । बैंक तथा वित्तीय संस्थाहरुको संख्या भने बढेको छ । राष्ट्र बैंकबाट इजाजतप्राप्त बैंक तथा वित्तीय संस्थाहरुको संख्या २०७५ असार मसान्तमा १५१ रहेकोमा २०७६ असार मसान्तमा १७१ पुगेको छ ।
यस अनुसार २०७६ असार मसान्तमा २८ वाणिज्य बैंक, २९ विकास बैंक, २३ वित्त कम्पनी, ९० लघुवित्त वित्तीय संस्था र १ पूर्वाधार विकास बैंक संचालनमा रहेका छन्। बैंक तथा वित्तीय संस्थाहरुको शाखा संख्या २०७५ असार मसान्तमा ६६५१ रहेकोमा २०७६ असार मसान्तमा ८६८६ पुगेको छ ।
