बुटवल, भदौ १३ ।
नेपाल कम्युनिष्ट पार्टी (क्रान्तिकारी माओवादी)का महासचिव मोहन वैद्यले आगामी उपनिर्वाचन बहिष्कार गर्ने घोषणा गर्नुभएको छ ।
क्रान्तिकारी पत्रकार महासंघ रुपन्देहीले आज आयोजना गरेको पत्रकार भेटघाटमा अध्यक्ष वैद्यले आगामी मंसिर १४ गते ५० स्थानमा हुने उपनिर्वाचन बहिष्कार गर्ने निर्णय आफ्नो पार्टीले गरेको बताउनु भएको हो ।
आवश्यकता अनुसार निर्वाचनलाई उपयोग गर्न सकिने नीति भए पनि यो सरकार जनताबाट नांगिदै गएकाले भण्डाफोर गर्नका निम्ति निर्वाचनको उपयोगभन्दा बहिस्कार नै उपर्युक्त हुने उहाको भनाइ थियो ।
उहाले सरकारमा बसेका पार्टीहरुले कम्युनिष्टको बदनाम गरिरहेको आरोप पनि लगाउनु भएको छ । जनतामा भ्रम छर्ने काम भएको भन्दै उहाले यो कम्युनिष्टको सरकार नभएको पनि बताउनु भयो ।
सरकार जताजता हावा चल्छ, त्यतै बग्ने गरेको आरोप लगाउँदै उहाले जनताको समस्याहरुको समाधान गर्न यो सरकारले नसक्ने दावी समेत गर्नुभएको छ । विप्लव नेतृत्वको नेपाल कम्युनिष्ट पार्टीलाई दमन गर्ने सरकारको नीति गलत भएको बताउनु भयो ।