काठमाडौं, साउन १९ ।
उद्योगी र व्यवसायीहरुले कर वृद्धि गरिएको भन्दै सरकारको चर्को विरोध गरेका छन् । नेपाल उद्योग वाणिज्य महासंघका उपाध्यक्ष किशोरकुमार प्रधान, नेपाल चेम्बर अफ कमर्शका अध्यक्ष राजेशकाजी श्रेष्ठ र नेपाल उद्योग परिसंघका अध्यक्ष सतिसकुमार मोरले चालू आर्थिक वर्षबाट एकैपटक चार गुणा बढि हुने गरी कर वृद्धि गरेको भन्दै सरकारको आलोचना गरेका हुन् ।
आजबाट ललितपुरमा सूरु भएको व्यवस्थापन गोष्ठीमा चेम्बर अफ कमर्शका अध्यक्ष श्रेष्ठले स्थानीय तहमा समेत गरी दोहोरो करको मारमा परको भन्दै सरकारको ध्यानाकर्षण गराउनु भयो । उहाँले करको दायरा बढाउने अभियानमा भने सरकारलाई साथ दिने प्रतिवद्धता व्यक्त गर्नु भयो ।
परिसंघका अध्यक्ष मोरले कर मैत्री वातावरण बनाउन सरकारसँग माग गर्नुभयो। उहाँले व्यवसायीहरुलाई हतोत्साही हुने गरी करको व्यवस्था सरकारले गर्न नहुने धारणा राख्नुभयो ।
वाणिज्य महासंघका उपाध्यक्ष प्रधानले सरकारले चालू आर्थिक वर्षबाट कर वृद्धि गरेर व्यवसायीहरुलाई मारमा पारेको भन्दै तत्काल हटाउन माग गर्नु भयो । उहाँले व्यवसायका लागि चर्को व्याजदरका कारण मुलुकको उद्योगधन्दा फष्टाउने अवस्था नरहेको तर्फ पनि सरकारको ध्यानाकर्षण गराउनु भयो ।
