काठमाडौं, साउन १३ ।
गृहमन्त्री रामबहादुर थापा बादलले कार्यसम्पादनमा कमजोर प्रहरी कर्मचारीको निगरानी भइरहेको बताउनु भएको छ ।
आज राष्ट्रियसभाको प्रत्यायोजित व्यवस्थापन तथा सरकारी आश्वासन समितिमा उहाँले व्यवसायिकता प्रदर्शन नगर्ने र कमजोर कार्यसम्पादन भएका प्रहरी कर्मचारीको गृह मन्त्रालयले निगरानी गरिरहेको बताउनु भएको हो ।
उहाँले उच्च कार्यसम्पादन स्तर भएका सुरक्षाकर्मीहरुको मनोबल उच्च बनाई अपराध अनुसन्धामा व्यवसायिकता प्रदर्शन गर्दै लगिएको पनि बताउनु भयो ।
गत वर्षको साउनमा भएको कञ्चनपुरकी निर्मला पन्तको बलात्कारपछि हत्याको घटनामा तुरुन्त अपराधी पत्ता लगाई कानूनी कारबाहीमा ल्याउन नसके पनि प्रहरीले निकै गम्भीरताका साथ अनुसन्धान गरिरहेको उहाँले बताउनु भयो ।
अनुसन्धानलाई नतिजामा र्पुयाउन कुनै कसर बाँकी नराख्ने बताउदै गृहमन्त्री थापाले अनुसन्धान कार्यमा हुने कुनै पनि किसिमको लापरबाहीलाई मन्त्रालयले नसहने बताउनु भयो ।
समिति बैठकमा सांसदहरुले निर्मला पन्तको बलात्कारपछि हत्याको घटनाको अनुसन्धानमा प्रहरी कहाँ अलमलियो भनी प्रश्न गरेका थिए ।