काठमाडौं, १२ साउन ।
सत्तारुढ दल नेपाल कम्युनिस्ट पार्टीको सचिवालय बैठक पुनः स्थगित भएको छ। आज बस्ने भनिएको बैठक भोलि दिउँसो ३ बजे बस्नेगरी स्थगित भएको नेकपाका प्रवक्ता नारायणकाजी श्रेष्ठले जानकारी दिए ।
उनले भनेका छन्, आज बस्ने भनिएको हाम्रो पार्टी नेकपाको सचिवालयको बैठक भोलि सोमबार दिउँसो ३ बजे बस्ने भएको छ।
पछिल्लो पटक साउन ५ गते बसेको सचिवालय बैठक त्यसयता दुई तीन पटक स्थगित भएको हो । ३२ विभागहरु मध्ये स्कुल विभागको नेतृत्व विवादका कारण गत ५ गतेको बैठकले अन्तिम निष्कर्ष दिन सकेन।
सो बैठकले सबै जिल्ला कमिटीको इन्चार्ज र सह(इन्चार्ज टुंग्याएको थियो। तर, विभागको नेतृत्व टुंग्याउन सकेको थिए।
यस्तै ६ गते दुई अध्यक्ष तथा नेताहरु आन्तरिक रुपमा गृहकार्य गरे। तर पनि, सहमति जुटेन। ७ गतेको बैठक स्थगित गरी ९ गतेका लागि बोलाइयो। फेरी ९ गतेको बैठक पनि स्थगित भयो। त्यसपछि आजका लागि बैठक बोलाइएको थियो। आजको बैठक पनि स्थगित भइ भोलिका लागि सारिएको छ।
ने क पा एकताको १४ महिना पुगिसक्दा अझै ३२ विभाग, तीन केन्द्रीय आयोग तथा सम्पर्क मञ्चहरुको गठन हुन सकेको छैन। त्यस्तै पोलिटव्यूरो गठनमा अन्यौलता कायमै रहेको छ।
ने क पाका ३२ केन्द्रीय विभाग मध्ये पूर्वएमालेको भागमा १८ र पूर्वमाओवादीका भागमा १४ विभाग पाउने गरी भागबन्डा मिलाइएको छ। तर, कुन विभाग कसलाई दिने र कसले नेतृत्व गर्ने विषयमा सहमति जुट्न नसकेको हो।
पछिल्लो पटक स्कुल विभागमा नेताहरुको चर्काचर्की परेको छ। विभागमा सचिवालय सदस्यहरु ईश्वर पोखरेल र नारायणकाजी श्रेष्ठले दाबी गर्दै आएका छन्। स्थायी कमिटी सदस्य घनश्याम भुषाल र बेदुराम भुषालले दाबी प्रस्तुत गरेका छन्। बेदुराम भुषाल यसअघि तत्कालिन नेकपा एमालेको स्कुल विभागको प्रमुख रहेर काम गरिसकेका छन्।
