काठमाडौं, ५ साउन । विप्लव नेतृत्वको नेकपा कम्युनिस्ट पार्टीका केन्द्रिय सदस्य तथा उपत्यका ब्यूरो इन्चार्ज माइला लामा ‘प्रज्वल’लाई प्रहरीले गिरफ्तार गरेकेा छ । उनलाई काठमाडौंको काँडाघारीबाट प्रहरीले शनिवार मध्यराती गिरफ्तार गरेको हो ।
नेता लामालाई अपराध महाशाखाको टोलीले गिरफ्तार गरेको बताइएको छ । विशेष सूचनाको आधारमा काँडाधारीबाट राती साढे १२ बजेतिर पक्राउ गरिएकाे महानगरीय अपराध महाशाखाले जनाएकाे छ ।महानगरीय अपराध महाशाखाका प्रमुख एसएसपी सहकुल थापाले लामा पक्राउ परेको पुष्टि गर्दै विशेष सूचनाको आधारमा काँडाधारीबाट राती साढे १२ बजे पक्राउ गरिएकाे मिर्मिरे अनलाइनलाइ जानकारी दिए । लामासँगै रेशम तामाङलाई पनि पक्राउ गरिएको एसएसपि थापाले जानकारी दिएका छन् । दुबै जनालाई हाल महानगरीय प्रहरी पीसर टेकुमा राखिएकाे छ ।
काठमाडौं सीतापाइलाका लामा तत्कालीन माओवादीको जनसांस्कृतिक महासंघका अध्यक्ष हुन् । २०६४ सालमा संबिधान सभाको निर्बाचनमा लामा काठमाडौंबाट उमेदवार भएका थिए । लामा जनवादी गायक समेत हुन् ।
एकीकृत माओवादी बिभाजन भएपछि लामा मोहन वैद्य हुँदै ने.क.पा.मा आबद्ध छन् । फागुन २८ गते सरकारले नेकपालाई प्रतिबन्ध लगाएसँगै प्रहरीले साे पार्टीका शीर्ष नेतासहित ५०० बढि नेता कार्यकर्ता नियन्त्रणमा लिइसकेको छ ।