इटहरी, ४ साउन ।
नेपाली कांग्रेसका सभापति शेरबहादुर देउवाले वर्तमान सरकारले लोकतान्त्रिक मूल्य–मान्यताबिरुद्ध धावा बोलिरहेको बताउनु भएको छ ।
नेपाल प्रेस युनियन इटहरीले आज आयोजना गरेको पत्रकार सम्मेलनमा बोल्दै सभापति देउवाले सरकारको कदम नसच्चिए सत्तारुढ बाहेक अन्य सम्पूर्ण दल संगठित भएर कडा कदम चाल्ने चेतावनी समेत दिनुभयो ।
सरकारले प्रेस तथा मानव अधिकार आयोगमाथि ‘कन्ट्रोल’ गर्ने प्रयास गर्नु लेख्ने, बोल्ने र अभिव्यक्ति स्वतन्त्रतामाथि नै आक्रमण गर्नु भएको उहाँको भनाई छ ।
सरकारले प्रेसमाथि अंकुश लगाएर जेलसम्म हाल्ने कुरा गरेको भन्दै सभापति देउवाले यसको काग्रेसले बिरोध गरेको र मानवअधिकार आयोगमाथि नियन्त्रण गर्ने कार्य पनि सह्य नहुने बताउनु भयो ।
यस्तै देउवाले उद्योगी–व्यवसायीबिरुद्ध मनोमानी ढंगले लगाएको कर पनि जायज नभएको तर्क गनुर््भयो । तराईका डुबान तथा बाढीले प्रभावित प्रदेश नं. २ का जिल्लाको अवलोकन गरि आज ईटहरी पुग्नुभएका सभापति देउवाले सरकारले भारतसँग कुटनीतिक पहल गर्न नसकेका कारण तराईमा बाढी तथा डुबानले बढी क्षति गरेको आरोप लगाउनु भयो ।
उहाँले बाढी पिडितको उद्धार तथा राहतमा सरकारले ध्यान नदिएको समेत जिकिर गर्नुभयो । पीडितको राहत र पुनर्स्थापनामा प्रतिपक्षी दलको हैसियतमा सहयोग गर्ने पनि उहाँले घोषणा गर्नुभयो ।
कांग्रेस संसदीय दलको निर्णयअनुसार संघीय सांसदले पाँच दिनको र प्रदेश सांसदले १० दिनको तलब दिने निर्णय गरेका छन्।