काठमाडौं, असार २० ।
सत्तारुढ दल नेपाल कम्युनिस्ट पार्टी (नेकपा)का अध्यक्ष पुष्पकमल दाहाल प्रचण्डले शान्ति प्रक्रिया भाँड्न चलखेल भइरहेको बताउनु भएको छ । समाजवादी पार्टी छाडेर नेकपा प्रवेश गरेका नेता कार्यकर्तालाई आज पार्टी प्रवेश गराउँदै प्रचण्डले शान्ति प्रक्रिया भाँड्ने चलखेल घातक भएको बताउनु भएको हो ।
शान्ति प्रक्रिया भाड्नकै लागि केही मानिसलाई युरोप घुमाएको भन्दै उहाँले असन्तुष्टि जनाउनु भयो। पुर्वपधानमन्त्री समेत रहनु भएका अध्यक्ष प्रचण्डले कार्यक्रममा आफ्ना पूर्व सहकर्मीहरुलाई पार्टी एकतामा आउन आग्रह गर्नुभयो ।
उहाँले डा. बाबुराम भट्टराई, मोहन बैद्य, मोहनविक्रम सिंह, चित्रबहादुर केसी र नारायणमान विजुक्छेलाई पनि एकता प्रक्रियामा आउन आग्रह गर्नुभयो । यस्तै सोही कार्यक्रममा बोल्दै नेकपाका नेता देवेन्द्र पौडेलले आफ्नो पार्टीले ५ वर्ष नभई २५ वर्षसम्म सरकार चलाउने दाबी गर्नु भएको छ ।
कतिपयले नेकपाको सरकार ५ वर्षपछि टिक्दैन भनेको स्मरण गर्दै नेता पौडेलले ५ वर्षका लागि जनताले मत दिसकेकाले अब २५ वर्षसम्म वामपन्थीबाहेक अरु आउने सम्भावना नभएको बताउनुभयो ।