काठमाडौं, ६ असार ।
नेपाल कम्युनिस्ट पार्टीले पार्टीका सर्लाहि जिल्ला इन्चार्ज कुमार पौडेलको हत्याको बिरोधमा नेपाल बन्दसहित चरणबद्ध आन्दोलनको घोषणा गरेको छ । महासचिव विप्लवले आज विज्ञप्ति जारी गर्दै नेपाल बन्दलगायत सङ्घर्षका कार्यक्रम सार्वजनिक गर्नुभएको हो ।
सरकारले भुठो मुठभेडका नाममा पौडेललाई नियन्त्रणमा लिएर हत्या गरेको भन्दै ने.क.पा.ले यहि असार १० गते नेपाल बन्दको आह्वान गरेको छ । यस्तै भोली प्रचार प्रसार गर्ने, ८ गते कोणसभा तथा घरदैलो र ९ गते मसाल जुलुस निकाल्ने कार्यक्रम छ ।
असार ५ गते राजनीतिक कार्यक्रम सकेर फर्कंदै गर्दा सर्लाही लालबन्दी १ लखन्ती खोलामा पौडेललाई प्रहरीले नियन्त्रणमा लिएर बर्बरतापूर्वक हत्या गरि झुठो मुठभेडको प्रचार गरिएको ने.क.पा.ले बताएको छ ।
महासचिव विप्लवले सरकारले देशलाई भयानक भिडन्ततिर धकेल्ने र लूटको राज्य लम्ब्याउने बदनियतले मुठभेडका नाममा दैनिक निःशस्त्र कार्यकर्तालाई नियन्त्रणमा लिँदै हत्या गर्ने गरेको बताउनु भएको छ ।
विज्ञप्तिमा भनिएको छ, ‘यसैक्रममा पौडेललाई सरकारले नियन्त्रणमा लिएर बर्बरतापूर्वक हत्या गरेको छ र जनता तथा आफ्नो गैरन्यायिक हत्या र अपराधमाथि पर्दा हाल्न कथित भिडन्तको कथा सार्वजनिक गरेको छ । पार्टी फासिवादी सरकारको त्यो दाबी खारेज गर्दछ । ’
उहाँले उक्त घटनाको निश्पक्ष छानविनका लागि न्यायप्रेमी नागरिक, मानव अधिकारकर्मी, सञ्चारजगत् र बौद्धिक तथा नागरिक समाजसँग अपिल समेत गर्नुभएको छ ।
महासचिव विप्लवले वार्ताको प्रचार गर्दै राजनीतिक कार्यकर्ताहरूको हत्या गर्ने सरकारको षड्यन्त्रविरुद्ध दृढ भएर लाग्न सबै पक्षमा आह्वान पनि गर्नुभएको छ । साथै पार्टी कार्यकर्तालाई सक्रिय रक्षामा रहन पनि उहाँले निर्देशन दिनुभएको छ ।
ने.क.पा.ले कुमार पौडेललाई सहिद घोषणा गर्दै सहिदका आफन्तजनप्रति गहिरो समवेदना प्रकट गरेको छ । सहिदको सपना पूरा गरिछाड्ने प्रतिबद्धता व्यक्त गर्दै विज्ञप्तिमा पौडेलको हत्याको बदला क्रान्तिको प्रक्रियामा लिने पनि प्रतिबद्धता व्यक्त गरिएको छ ।
