काठमाडौं, असार ४ ।
प्रमुख प्रतिपक्षी दल नेपाली कांग्रेसका सभापति तथा संसदीय दलका नेता शेरबहादुर देउवाले संविधानविपरित सरकारले संसदमा ल्याएका मिडिया काउन्सिल लगायत अन्य विधेयक पनि फिर्ता लिन माग गर्नुभएको छ ।
प्रतिनिधिसभाको आज बसेको बैठकको सुरुमै बोल्दै संसदीय दलका नेता देउवाले गुठी विधेयकसँगै मिडिया काउन्सिल विधेयक र मानवअधिकार आयोगसम्बन्धी विधेयक सरकारले संविधान विपरित ल्याएको दावी गर्दै खारेज गर्न माग गर्नुभयो ।
ती विधेयक जबरजस्ती संसद्मा पेश गर्न खोजिए पारित गर्न नदिने उहाँको चेतावनी छ । सरकारले पछिल्लो समय ल्याएको विधेयकले लोकतन्त्रका मूल्य मान्यतामाथि आक्रमण गरेकाले कुनै हालतमा पारित हुन नदिने चेतावनी उहाँको छ ।
देउवाले मिडिया काउन्सिल, सूचना प्रविधि, राष्ट्रिय सुरक्षा परिषद सम्बन्धी र राष्ट्रिय मानव अधिकार आयोग सम्बन्धी विधेयकलाई कांग्रेसले जुनसुकै मूल्य चुकाएर भएपनि पारित हुन नदिने घोषणा गर्नुभयो ।
देउवाले सरकार एकपछि अर्को विधेयकमार्फत प्रजातन्त्रलाई समाप्त पार्न उद्यत रहेको आरोप पनि लगाउनुभयो ।
गुठीसम्बन्धी विधेयक फिर्ता गर्ने मन्त्रीको घोषणा कानुन सम्मत नभएको भन्दै उहाँले संसदमा प्रवेश भइसकेको विधेयक संसदले नै फिर्ता गर्नुपर्ने प्रक्रिया रहेको समेत स्मरण गराउनु भयो ।
देउवाले संसद्मा प्रतिपक्षी उठेपछि उसलाई पहिले बोल्न दिनुपर्ने अन्तर्रा्ष्ट्रिय मान्यता रहेको समेत भन्दै संसदीय अभ्यासअनुसार संसारमै संसद विपक्षीको र सरकार सत्तापक्षको हुने प्रष्ट पार्नुभयो ।
यस्तै सभापति देउवाले प्रधानमन्त्री केपी शर्मा ओलीले आफूलाई हेपेको भन्दै दुःखेसो समेत पोख्नुभयो । संसदीय परम्पराअनुसार प्रधानमन्त्री बोल्दा प्रतिपक्षी दलको नेता र प्रतिपक्षी दलको नेता बोल्दा प्रधानमन्त्री उपस्थित हुनुपर्ने बताउदैँ देउवाले आफु बोल्ने समयमा प्रधानमन्त्री ओली उपस्थित नभएर आफुलाई हेपेको बताउनु भयो ।
प्रधानमन्त्रीको युरोप भ्रमण पनि उपलब्धिविहीन भएको समेत सभापति देउवाले टिप्पणी गर्नुभयो । प्रतिनिधिसभाको बैठक अहिले बसिरहेको छ ।