वीरगञ्ज ३ असार ।
अमलेखगञ्ज–मोतिहारी पेट्रोलियम पाइपलाइन परियोजना अन्र्तगत नेपाल तर्फको पाइप गाड्ने काम पनि सकिएको छ । पर्सा राष्ट्रिय निकुञ्ज अन्तर्गत पर्ने पथलैया देखि अमलेखगञ्ज जंगल क्षेत्रमा रुख कटान भएपछि पाईपलाईन गाड्ने कामले पूर्णता पाएको हो ।
रुख कटानको विषयमा आवश्यक निर्णय नआएका कारण लामो समय ९ किलोमिटर क्षेत्रमा पाइप गाड्न नपाउँदा काम अघि बढ्न सकेको थिएन । ०७५ माघ ३ गते नेपाल सरकारको मन्त्रिपरिषदको बैठकले रुख काट्ने निर्णय गरेपछि त्यस क्षेत्रमा रुख काटिएको थियो ।
रुख कटान गरेर पन्छाएका क्षेत्रमा पनि भूमिगत पेट्रोलियम पाइपलाइन विछ्याउने काम सकिएको आयोजनाका मेकानिकल इन्जिनियर सरद पौडेलले बताउनु भएको छ ।
नेपालतर्फ अमलेखगञ्जदेखि रक्सौलसम्म ३६.२ किलोमिटर पाईप गाडिएको हो । रक्सौलदेखि मोतिहारीसम्म ३२.७ किलोमिटर पाइप गाड्ने काम सम्पन्न भइ टेष्टिङसमेत भइसकेको छ ।
यस्तै पेट्रोलियम पदार्थ भण्डारणका लागि अमलेखगञ्ज डिपोमा ४१ सय लिटरका २ वटा र ३९ सय किलो लिटरका १ वटा गरी ३ वटा ट्यांकी मर्मतको काम पनि सकिएको छ । ४१ सय किलोलिटरका २ र ३९ सय किलो लिटर तेल अटने क्षमताका १ वटा ट्याङ्की मर्मत भइसकेका हुन् । ती मध्ये दुई वटा ट्याङकीमा तेल भण्डारण सुरु भइसकेको छ ।
एउटा ४१ सय किलो लिटर क्षमताको ट्याङकीमा बाहिरी रंगरोगनको काम मात्रै बाँकी छ । बाँकी ३९ सय लिटरको एउटा ट्याङकी भित्र सफा गर्नुको साथै मर्मतको काम चलिरहेको छ । ट्यांकी मर्मतको काम पनि अन्तिम चरणमा पुगेको इन्जिनियर पौडेलले बताउनु भयो ।
पाइपलाइनमार्फत पेट्रोल, डिजेल र मट्टीतेलको ढुवानी गर्न सकिने भएपनि परियोजना सम्पन्न भएपछि पाईपलाईनबाट डिजेल मात्रै ल्याउने तयारी छ ।
