काठमाडौं, ३२ जेठ । नेपाल कम्युनिस्ट पार्टीले पूर्व शिक्षामन्त्री तथा सत्तारुढ नेकपाका नेता धनीराम पौडेल (डीआर पौडेल ) को असामयिक निधनप्रति गहिरो शोक र श्रद्धाञ्जली प्रकट गरेको छ ।
पार्टी प्रवक्ता प्रकाण्डले शनिवार श्रद्धाञ्जली वक्तव्य जारी गर्दै वामपन्थी आन्दोलनका एक इमानदार व्यक्तित्व पौडेलको निधनप्रति हार्दिक श्रद्धाञ्जली प्रकट गर्दछौँ र शोकसन्तप्त परिवारमा गहिरो समवेदना व्यक्त गर्नुभएको हो ।
सरकारी नेकपामा रहेर पनि सरकारको फासिवादी दमनको सशक्त विरोध गर्दै आएका पौडेलको निधनले नेपालको राष्ट्रियताको आन्दोलनलाई समेत धक्का पुगेको प्रवक्ता प्रकाण्डले बताउनु भएको छ ।
पौडेल सत्तारुढ नेकपाका केन्द्रीय सदस्य र उच्चस्तरीय राष्ट्रिय शिक्षा आयोगका सदस्य रहिसकेका थिए । उनको शुक्रबार बिहान ६ः४५ मा हृदयाघातका कारण चितवनमा निधन भएको थियो । शुक्रबारै उनको अन्त्येष्टि गरिएको छ ।
स्याङ्जाको दरौँमा २०२३ सालमा जन्मिएका पौडेल तत्कालीन नेकपा (एकताकेन्द्र मसाल) र नेकपा (माओवादी) एकीकरण भएपछि बनेको एकीकृत नेकपा (माओवादी)का पोलिटब्युरो सदस्य थिए । पौडेल ‘जन एकता’ साप्ताहिकको सम्पादकसमेत थिए । उनका श्रीमती गङ्गा बेल्बासे र दुई छोरी छन् ।
