काठमाडौं, जेठ २२ । पत्रकारको नाक भाँच्नका लागि एक करोड रुपैयाँ छुट्याएको भनेर इटहरी उपमहानगरपालिकाका मेयर द्वारिक चौधरीले दिएकाे अभिव्यक्ति पछि सामाजिक सञ्जालमा चर्को विरोध भइरहेको छ । सत्तारूढ नेपाल कम्युनिस्ट पार्टी (नेकपा)का कार्यकर्तासमेत रहेका मेयर चौधरीले विभिन्न संचारमाध्यममा अन्तरवार्ता दिँदै आफ्ना भनाइको प्रतिरक्षा गर्नुका साथै कानुन हातमा लिने चेतावनी खुलेआम दिइरहेका छन् ।
यसैक्रममा नेकपाका युवा नेता तथा सांसद योगेश भट्टराईले मेयर चौधरीलाई आफ्ना भनाइप्रति आत्मालोचना गरी पदीय गरिमा र पार्टीको प्रतिष्ठाप्रति सचेत रहन अनुरोध गरेका छन् । उनले सामाजिक सञ्जालमार्फत मेयर चौधरीलाई सुझाव दिदै लेखेका छन्, ‘म द्वारिकजीको हकी स्वभाव, प्रष्ट वक्ता र इमानदारिताको पहिलेदेखि कै प्रशंसक हुँ ।’
उनले अगाडि लेखेका छन्, ‘तर केही दिन यता उहाँले पत्रकार र अन्य कतिपय व्यक्तिका बारेमा सार्वजनिक भएका अभिव्यक्ति स्वयं उहाँले धारण गर्नुभएको सार्वजनिक पद, उहाँले प्रतिनिधित्व गर्नुभएको पार्टी (नेकपा) र स्वयं उहाँको राजनीतिक उचाईका लागि कदापी सुहाउँदैन ।’
