काठमाडौं, १४ जेठ ।
काठमाडौंको सुकेधारमा भएको बम विस्फोटमा परी मारिएका नेपाल कम्युनिस्ट पार्टीका कार्यकर्ता दिपेन विक ‘दिपेन्द्र’को मंगलवार पशुपति आर्यघाटमा अन्त्येष्टी गरिदैछ । दिपेन्द्रको सोमवार सुकेधाराको ढलाने पुल छेउमा बम विस्फोट हुँदा मृत्यु भएको थियो ।
पोष्टमार्टमका लागि उनको शव प्रहरीले टिचिङ अस्पतालमा राखिएको थियो । अस्पतालबाट सिधै पशुपति आर्यघाट लगेर अन्तिम संस्कार गर्ने पारिवारीक श्रोतले जनाएको छ ।
२८ का दिपेन विक कालिकोट जिल्लाको मुम्रा निवासि हुन् ।
यस्तै सोहि विस्फोटमा मारिएका बाग्लुङ घर भएका वर्ष ४० का निरन्तर मल्ल र दाङको बबही गाँउपालिकाका वर्ष ३२ का गोकुल रानामगर ‘महान’को शव भने गृहजिल्ला लैजाने तयारी भएको बुझिएको छ ।
तीनै जनाको शव टिचिङ हस्पिटलमा राखिएको र परिवारले बुझेलगत्तै आजै निरन्तर र महानको शव गृहजिल्ला लैजाने बताईएको छ । अहिले अस्पतालमा आफन्त तथा शुभचिन्तकको भिडभाड रहेको छ ।
अनामनगरको घट्टेकुलोमा भएको बिस्फोटमा मृत्यु भएका बझाङ घर भई कलंकी बस्ने वर्ष २६ का प्रज्वल शाहीको भने सोमवार नै पशुपति आर्यघाटमा अन्त्येष्टी गरिएको थियो ।