नेपालगन्ज ११ जेठ ।
सत्तारुढ दल नेपाल कम्युनिस्ट पार्टीका वरिष्ठ नेता माधवकुमार नेपालले सोचेर काम नगर्दा सरकारका निर्णय विवादास्पद बन्न पुगेको बताउनु भएको छ ।
प्रेस संगठन बाँकेले आज नेपालगन्जमा आयोजना गरेको पत्रकार भेटघाटमा पूर्वप्रधानमन्त्री समेत रहेका वरिष्ठ नेता नेपालले कुनै पनि काम गर्ने क्रममा सरकारले सोचेर मात्र गर्नुपर्ने दिनुभएको हो ।
विधेयकमा कहाँ–कहाँ सुधार्न सकिन्छ, त्यसको निम्ति सबैको राय, सुझाव लिएर त्यसलाई परिमार्जित गरी शंशोधन गरेर सर्वस्वीकार्य बनाउनुपर्नेमा उहाको जोड छ । सरकारले काम गर्न खोज्दा कतिपय त्रुटी गरेकाले अझै पनि सच्याएर अगाडि बढ्ने समय रहेको नेपालको भनाई छ ।
कम्युनिस्ट पार्टी सरकारमा आएपछि र शक्तिशाली भएपछि कतिपय दलहरुले बिरोधका कुरा मात्रै अगाडि सारेको भन्दै विरोधका निम्ति मात्र विरोध गर्ने काम गर्न नहुने नेता नेपालले बताउनु भयो । पूर्वप्रधानमन्त्री नेपालले वर्तमान सरकारले जनअपेक्षा अनुसार नै बजेट ल्याउनेमा आफू आशावादी रहेको बताउनु भएको छ ।
अर्को प्रसंङ्गमा उहाले पार्टी अध्यक्ष एवम् प्रधानमन्त्री केपी शर्मा ओलीप्रति संकेत गर्दै पार्टीभित्र विधि र पद्धतिलाई बसाल्न आफूले खबरदारी गरिरहेको बताउनु भएको छ ।
पार्टीको एकीकरणको प्रक्रिया माथिबाट क्रमश तलतिर क्रमिक रुपले गइरहेको दाबी गर्दै उहाले एकीकरणको काम केन्द्रीय तहमा पनि केही गर्न बाँकी रहेको बताउनु भयो ।
पार्टीले सरकारको कामको पनि समिक्षा, मूल्यांकन गर्नुपर्ने नेपालले जोड दिनुभएको छ । पत्रकारले सोधेको जिज्ञासामा उनले सांसदलाई करोडौंको बजेट बाँड्न नहुनेमा जोड दिदै त्यसरी रकम बाँडिए ठूलो आर्थिक अनियमितता हुने संकेत गर्नुभएको छ ।
-फाईल फोटो