काठमाडौं, जेठ ११ ।
राष्ट्रपति विद्यादेवी भण्डारीले संविधानले नै महिलाको अधिकार सुनिश्चित गरेकाले यसको प्रभावकारी कार्यान्वयनका लागि सबै जागरुक हुनुपर्ने बताउनु भएको छ ।
मानवअधिकारका लागि एकल महिला समूहको २५औं रजतजयन्तीका अवसरमा आज काठमाडौंमा आयोजित कार्यक्रममा उहाले संविधानमा महिला–पुरुषको समान अधिकार स्थापित भएकाले यसको व्यावहारिक कार्यान्वयनमा जोड दिनुभएको हो ।
राष्ट्रपति भण्डारीले एकल महिलाका लागि सरकारले सामाजिक सुरक्षाको व्यवस्था गरेको बताउँदै उनीहरुलाई आर्थिक एवं सामाजिक परिवर्तनका लागि अग्रसर गराउनु अहिलेको आवश्यकता रहेको औंल्याउनु भएको छ ।
कार्यक्रममा उपप्रधान एवं रक्षामन्त्री ईश्वर पोखरेलले कानुनतः एकल महिलाको अधिकार स्थापित भएपनि सामाजिक, सांस्कृतिक एवं आर्थिक हिसाबले भेदभावको अवस्था कायम रहेकाले यसविरुद्ध सबै जुट्नुपर्ने बताउनु भएको छ ।