काठमाडौं, जेठ ५ ।
नेपाली कांग्रेसका नेता डा शेखर कोइरालाले कांग्रेसका नेता सुध्रिए पार्टीमा स्वतः जागरण आउने बताउनु भएको छ ।
नेपाली कांग्रेस चितवन–काठमाडौं सम्पर्क समितिले जागरण अभियानको सन्दर्भमा आज काठमाडौंमा आयोजना गरेको कार्यक्रममा नेता कोइरालाले जागरण अभियानका दौरान नेताले गुटबन्दी नगर्ने प्रण लिनुपर्ने जिकिर गर्नुभएको हो ।
उहाँले कांग्रेसको कमजोरी कांग्रेस नै हुने अवस्थाको अन्त्य गरेमात्रै जागरण अभियान सार्थक हुने बताउनुभयो। वर्तमान सरकारले प्रेस स्वतन्त्रता र मानव अधिकारको धज्जी उडाएको भन्दै नेता कोइरालाले सरकारको कदमविरुद्ध आन्दोलन गर्न कार्यकर्तालाई नेतृत्वले प्रेरित गर्नुपर्ने बताउनुभयो ।
कार्यक्रममा कांग्रेस केन्द्रीय सदस्य प्रदीप पौडेलले जागरण अभियान कांग्रेसको आन्तरिक एकता मजबुद पार्नका लागि भएको भन्दै एकताबिना कम्युनिष्टसंगको प्रतिस्पर्धा सहज नहुने बताउनुभयो ।