चालू आर्थिक वर्षको ९ महिनामा व्यापार घाटा ९ खर्ब ९१ अर्ब रूपैयाँ पुगेको छ।
आयात उच्च दरको वृद्धिको तुलनामा निर्यात सुस्त हुँदा व्यापारघाटा चुलिएको हो। अघिल्लो आर्थिक वर्षको ९ महिना अवधिसँग तुलना गर्दा २२ प्रतिशतले व्यापार घाटा बढेको भन्सार विभागले जनाएको छ।
चैत महिनाको वैदेशिक व्यापारमा मात्र एक खर्ब ३ अर्ब रूपैयाँको घाटा छ ।
अहिलेकै दरमा व्यापारघाटा वृद्धि भए यो आर्थिक वर्षको अन्त्यसमम १४ खर्ब ३० अर्ब व्यापारघाटा हुने अनुमान गरिएको छ। यो आकार चालु आर्थिक वर्षको बजेटभन्दा ठूलो हो। सरकारले १३ खर्ब १५ अर्ब रूपैयाँको बजेट ल्याएकोमा मध्यावधि समीक्षामा गरिएको संशोधित अनुमान अनुसार ११ खर्ब ९९ अर्ब रूपैयाँ खर्च हुनेछ।
यो अवधिमा प्रमुख व्यापार साझेदार भारत र चीनबाट हुने आयातको हिस्सा कुल आयातको क्रमशः ६४.८ र १४.५ प्रतिशत छ भने कुल निकासी मध्ये भारत र अमेरिकाको हिस्सा क्रमशः ६३.४ र ११.४ प्रतिशत रहेको छ।
