काठमाडौं, वैशाख ६ । राष्ट्रिय प्रजातन्त्र पार्टीका नेता तथा कार्यकर्ताले धर्मनिरपेक्षताको ब्यानर तथा पोस्टर जलाएका छन् । पूर्वघोषित आन्दोलन कार्यक्रम अन्तर्गत राप्रपाका नेता कार्यकर्ताले बिभिन्न जिल्ल्लालाहरूमा धर्मनिरपेक्षताको ब्यानर तथा पोस्टर जलाएका हुन् ।
कञ्चनपुर, संखुवासभा, मकवानपुर, म्याग्दी, रुपन्देही लगायतका जिल्लामा धर्मनिरपेक्षताको ब्यानर तथा पोस्टर जलाउने कार्यक्रम सम्पन्न भइसकेको छ भने अन्य जिल्लामा पनि कार्यक्रम सञ्चालन भइरहेको जनाइएको छ ।
घोषित कार्यक्रमअनुसार आज सबै जिल्लामा धर्मनिरपेक्षताको ब्यानर तथा पोस्टर जलाउने कार्यक्रम छ । रुपन्देहीमा धर्मनिरपेक्षताको ब्यानर तथा पोस्टर जलाउने क्रममा आफ्ना कार्यकर्तामाथि प्रहरीले हस्तक्षेप गरेको राप्रपाले जनाएको छ ।
प्रहरी हस्तक्षेपका कारण जिल्ला अध्यक्ष सागरप्रताप राणासहित आफ्ना कार्यकर्ता कृष्ण बिडारी, अर्जुन खुलाल घाइते भएको राप्रपाले जनाएको छ । मकवानपुरको हेटौंडामा कार्यक्रमका क्रममा प्रहरीले धरपकड गरेको छ ।
