ओखलढुंगा, ३० चैत । नेपाली कांग्रेसका केन्द्रीय सदस्य तथा पूर्व श्रममन्त्री रमेश लेखकले अहिले विकास निर्माणका नाममा भ्रष्टाचार भइरहेका भन्दै कांग्रेसबाट निर्वा्चित जनप्रतिनिधिलाई त्यसबाट जोगिन आग्रह गरेका छन् ।
नेपाल प्रेस युनियनले शनिबार ओखलढुंगामा आयोजना गरेको पत्रकार सम्मेलनमा नेता लेखकले देशैभरि डोजरको खेति चलिरहेको बताए ।
उनले वर्तमान सरकार अपराध र भ्रष्टाचारमा डुबेको भन्दै उनले सरकारलाई पाकेको फर्सीको शंज्ञा दिए । ओली सरकार पाकेको फर्सी भएकाले आफैँ झर्ने उनको भनाई थियो ।
अहिलेको सरकार चिल देखाएर कुखुरा खाने स्याल प्रवृत्तिको भएको नेता लेखकको आरोप छ ।
सरकार पानीजहाज र रेलको सपनामा जनतालाई भुलाएर विकास होइन भ्रष्टाचार गर्न तल्लीन रहेको लेखकको भनाइ छ। नेता लेखकले कार्यकर्ताहरुलाई एक घण्टा प्रशिक्षण दिदैँ काँग्रेसले चुनावमा हार व्यहोरेको समीक्षासमेत सुनाएका थिए ।
कांग्रेसले हार्दा राष्ट्रिय एजेण्डा हारेकाले अबको चुनावमा काँग्रेसको जीतको विकल्प नभएको पनि उनको ठोकुवा छ ।