काठमाडौं । अमेरिकाले पाकिस्तानलाई दिदै आएको ३० करोड अमेरिकी डलर सहायता बन्द गरेको छ ।
पाकिस्तानले आतंकवाद नियन्त्रणमा प्रभावकारी काम गर्न नसकेको भन्दै सहयोग रकम रोक्का गर्ने निर्णय गरिएको हो ।
अमेरिकाबाट करोडौंं डलर सहायता लिएर पाकिस्तानले धोका दिएको राष्ट्रपति डोनाल्ड ट्रम्पले आरोप लगाउनुभएको छ ।
पाकिस्तानलाई दिन भनिएको शिर्षकको रकम अन्यत्र खर्च गरिने अमेरिकी रक्षामन्त्रालयले स्पष्ट पारेको छ । रक्षामन्त्रालयको निर्णय संसदबाट पास हुनुपर्नेछ ।
संसदबाट पारित प्रस्ताव आगामी वर्ष देखि लागू हुने बीबीसीले उल्लेख गरेको छ ।
हक्कानी नेटवर्क, अफगान तालिबान लगायतका आतंकवादी समुहलाई आफ्नो भुमि प्रयोग गर्न दिएर पाकिस्तानले कुनै पनि सम्झौता पालना नगरेको अमेरिकाले आरोप लगाएको छ ।
विदेशमन्त्री माईक पोम्प्योको ईस्लामवाद भ्रमणको केही दिन अघि ट्रम्प प्रशासनले सहयोग रोक्ने घोषणा गरेको हो । अमेरिकाले यसअघि प्यालेष्टाइन शरणार्थी एजेन्सीलाई दिने सहयोग समेत बन्द गरेको छ ।
अमेरिकी निर्णयले नवनिर्वा्चित पाकिस्तानी प्रधानमन्त्री इमरान खानलाई भने झट्का लागेको छ ।
पाकिस्तानको सत्ता सम्हालेलगत्तै अमेरिकाले सहयोग रकम रोक्का गर्दा खानलाई अप्ठेरो परेको हो ।
अमेरिकाले पाकिस्तानका लागि हालसम्म ३३ अर्ब अमेरिकी डलर सहयोग गरिसकेको छ ।
