एजेन्सी, भदौ १३ ।
रुसले शीत युद्ध अभ्यास पछि सबैभन्दा ठूलो सैन्य अभ्यास गर्ने घोषणा गरेको छ । रुसले गरिरहेको व्यवहारप्रति पश्चिमा मुलुकहरुले बढाइरहेको चासोकै बीच रुसी रक्षामन्त्री सर्गेइ सोएगुले आगामी महिना शीतयुद्धपछि पहिलो पटक सबैभन्दा विशाल युद्ध अभ्यास गर्ने घोषणा गर्नु भएको हो ।
‘भोस्टक–२०१८’ नामाकरण गरिएको उक्त सैन्य अभ्यासमा ३ लाख सुरक्षाकर्मी, ३६ हजार ट्यांक तथा बख्तर बन्द गाडि एवम् एक हजारभन्दा बढी लडाकु विमान सहभागी गराइने बताइएको छ ।
आगामी सेप्टेम्बर ११ तारिखदेखि पाँच दिनसम्म हुने अभ्यासमा मुलुकका केन्द्रदेखि पूर्वी क्षेत्रसम्मका सबैतहका सेनाको प्रतिनिधित्व हुने रक्षामन्त्री सर्गेइले जानकारी दिनुभयो ।
३६ हजार सैनिक हतियार, हतियार ट्यांक, सैन्य गाडीहरू एकैपटक चलेको यो पक्कै अनौठो हुने उहाँको भनाइ थियो । रुसले गर्ने अभ्यासमा उत्तरी तथा प्रशान्त जलसेनाका टोलीहरुका साथै चिनियाँ तथा मंगोलियाका सेना पनि सहभागी हुने बताइएको छ ।
रुसको सशस्त्र फौजमा कम्तिमा १० लाख सदस्य रहेका छन् । भोस्कोट २०१८ को सैन्य अभ्यासमा सहभागी फौज र विमानको परिमाण दोस्रो विश्वयुद्धताका भएका ठूला लडाइँमा खटिएका सेनाको बराबर संख्या हो ।
सो सैन्य अभ्यास राष्ट्रपति भ्लादिमिर पुटिनले पनि निरीक्षण गर्नुहुने बताइएको छ । रुसले गत वर्ष झापड–२०१७ नामक सैन्य अभ्यास गरेको थियो जसमा १२ हजार ७ सय सेनाको प्रयोग गरिएको थियो ।
