कञ्चनपुर, असार ३१ ।
समयमा काम सम्पन्न नगरेको भन्दै जिल्ला प्रशासन कार्यालय कञ्चनपुरले गृह मन्त्रालयमा नाम पठाएकामध्ये सन्तोषी–थेगिम निर्माण कम्पनी कालो सुचीमा पर्ने देखिएको छ ।
जिल्ला प्रशासन कार्यालयले समयमा काम सम्पन्न नगरेका २१ वटा आयोजनाका निर्माण कम्पनीको नाम जेठ १५ गते गृह मन्त्रालय पठाइएको थियो ।
जसमध्ये आधा दर्जनभन्दा बढी ठेक्का लिएको सन्तोषी–थेगिम कालो सूचीमा पर्ने देखिएको हो ।
जिल्ला प्रशासनले गृह मन्त्रालयमा नाम पठाएपछि अधिकांश निर्माण व्यवसायीले कामलाई निरन्तरता दिए पनि सन्तोषी–थेगिम जेभीले भने काममा ढिलासुस्ती गरेको डिभिजन सडक कार्यालयले जनाएको छ ।
कलुवापुर–बेलौरी सडकको ठेक्का लिएर लापर्वाही गरेको भन्दै डिभिजन सडक कार्यालयले दोस्रो पटक सूचना जारी गरेको छ ।
पटक–पटक ताकेता गर्दा पनि कम्पनीले काममा ढिलाई गरेकाले कालो सूचीमा पर्ने सम्भावना रहेको डिभिजन सडक कार्यालयका प्रमुख लक्ष्मीदत्त भट्टले बताए ।
डिभिजन कार्यालयले सनराइज बैंकमा जम्मा गरेको तीन करोड रुपैयाँ धरौटीसमेत रोक्का गरेको छ ।
मोबिलाइजेसन र हर्जानावापतको रकम धरौटीबाट असुल गरिने डिभिजन कार्यालयका प्रमुख भट्टले बताए ।
सन्तोषी–थेगिम जेभीले कृष्णपुरको ओदाल खोला पुल, बुडर नाइल बंक सडक र सोही ठाउँकै खार खोला पुल, बुडर नाइल बंक सडक, वाणी–देखतभूली सडक, कृष्णपुर–लालझाँडी र कलुवापुर–बेलौरी सडकको ठेक्का लिएको छ ।
जसमध्ये हालसम्म कुनै पनि आयोजना समयमै सम्पन्न नगरेको डिभिजन कार्यालयले जनाएको छ ।
असार मसान्तसम्म काम सम्पन्न गर्ने प्रतिबद्धता जिल्ला प्रशासन कार्यालयसमक्ष जनाएको भएपनि काम भने भएको छैन ।
