३० असार,काठमाडौं । नागरिकको ज्यान लिने क्रम नरोकिएपछि गृहमन्त्रालयले काठमाडौं उपत्यकामा बिहान ५ बजेदेखि राति ७ बजेसम्म ट्रिपर चलाउन रोक लगाए पनि आजै शनिबार दिउँसो काठमाडौंको सोल्टीमोडमा एक १८ वर्षीया किशोरीको ज्यान लिएको छ ।
मोटरसाइकल पछाडि बसेकी किशोरी अनुजा घिमिरेको घटनास्थलमै मृत्यु भएको हो । मोटरसाइकल चालक अनुजाका दाई अनुज घिमिरे भने सामान्य घाइते भएका छन् ।
दाजुबहिनी सवार बा ९६ प ४९११ नम्बरको मोटर साईकललाई ना ७ ख ९४७५ नम्बरको ट्रिपरले अपरान्ह पौने २ बजेतिर ठक्कर पछाडिबाट ठक्कर दिएको थियो ।
मृतक किशोरीको टाउको फुटेको छ भने अनुहारमा गम्भीर चोट लागेको बताइएको छ । ट्रिपरको ठक्करबाट अनुजाको मृत्यु भएको पुष्टि महानगरीय प्रहरी वृत कालिमाटीका प्रमुख डिएसपी प्रदिप क्षेत्रीले जानकारी दिएका छन् ।
ट्रिपर चालक राजकुमार तामाङ प्रहरीको नियन्त्रण लिएको भने मोटरसाईकल चालक अनुजको अवस्था सामान्य रहेको डिएसपी प्रदिप क्षेत्रीले बताए । हप्ता दिनभित्रै उपत्यकामा ट्रिपरले अनुजासहित तीनजनको ज्यान लिइसकेको छ ।
ट्रिपरमा ढुंगा लोड थियो । ट्रिपरको ठक्करबाट केही दिनअघि मात्र मोटरसाइकलमा सवार कोटेश्वर जडिबुटी चोकैमा भक्तपुर सल्लाघारीका रोयल सुवेदीको ज्यान गएको थियो ।
सुवेदी सवार मोटरसाइकलका चालक अमन ढुंगेलको खुटट्टा भाँचिएर गम्भीर घाइते भएका थिए । त्यसको दुईपछि नै ट्रिपरले नै जडिबुटीमा अर्को मोटरसाइकललाई ठक्कर दिई एकजना पुरुष चालकको ज्यान लिएको थियो ।
फाईल तस्बीर
