काठमाण्डौ, असार २८ ।
भारी वर्षाका कारण जनजीवन प्रभावित बनेको छ । गएराति देखि परेको अविरल वर्षापछि आएको बाढीले मुलुकका केहि वस्ती डुबानमा परेका छन् भने पहिरोले राजमार्ग ठप्प भएका छन् ।
यद्यपि, अहिलेसम्म मानवीय क्षतिको विवरण भने प्राप्त भएको छैन । वर्षाका कारण बागमती र हनुमन्ते खोलामा आएको बाढीले काठमाडौं र भक्तपुरका केही स्थान डुबानमा परेका छन् । हनुमन्ते खोलामा आएको बाढीले भक्तपुर र मध्यपुर डुबानमा परेको हो ।
भक्तपुरको जगाती, बाराहीका वस्तीमा जलमग्न रहेको छ भने भूकम्प पीडितको शिविर डुबानमा परेको छ । मध्यपुरथिमिको राधेराधे र कमेरोटार जग्गा एकीकरण आयोजनाभित्र रहेका वस्ती पुरै डुबानमा परेको छ ।गएराति देखि सयौं घर डुबानमा परेपछि त्यहाका बासिन्दा घर बाट बाहिर निस्कन सकेका छैनन् ।
राधे राधे र त्यसक्षेत्रका वस्तीका साथै भाटभटेनी सुपर मार्केटदेखि स्यामसुङ्ग कम्पनीसम्म पुरै डुबानमा परेको छ । राधेराधे अगाडिदेखि सानोठिमी जाने निकोसेरा सम्म नै डुबानमा परेपछि घरबाट निस्कने अबस्था नभएको प्रहरीले जनाएको छ ।
बुधबार राति देखी परेको अविरल वर्षाका कारण हनुमन्ते खोलामा आएको बाढीले डुबानमा परेको मध्यपुरथिमिमा अरनिको राजमार्गस्थित राधेराधे र भाटभोटेनी सुपर मार्केट क्षेत्रका बस्ती । तस्वीर: नविन पौडेल
जमिनबाट चारफिट माथिसम्म पानी जमेपछि घरभित्र पानी पसेको छ । मध्यपुरथिमिमा अरनिको राजमार्ग खण्डको दुबै क्षेत्र डुबानमा परेको छ । चारदोबाटोबाट बालकोट जाने वस्ती र गठ्ठाघरको तल्लो भेग डुबानमा परेको छ ।
मध्यपुर अस्पताल क्षेत्र र आसपासका घर पनि डुबानमा परेको छ । यता मनोहरा खोलामा आएको बाढी बस्तीमा पसेपछि जडिबुटीस्थित सुकुम्बासी वस्ती पुरै डुबानमा परेको छ । घर बाहिर निस्कन पनि नसक्ने र घरभित्रै बस्न पनि नसक्ने अवस्था रहेको स्थानीय अमर थापाले बताउनुभयो ।
बाढीका कारण बागमती नदी आसपास काठमाडौंका केही स्थान पनि प्रभावित भएका छन् । यस्तै वर्षाका कारण पुन्यमति खोलामा आएको बाढीले काभ्रेको बनेपा बजार डुबानमा परेको छ । आज विहान २ बजे देखि पुन्यमति खोलामा आएको बाढीले बनेपा बजारको करिब दुइ दर्जन घर डुबानमा परेको हो ।
बनेपा– ८ का जीवन नकर्मीको घरमा खोलाको बाढी पस्दा उनको घर बनाउन बसेका मजदुरहरु अलपत्र परेका थिए ।
उनीहरुलाई आज बिहान नेपाली सेनाको टोलीले उद्धार गरेको छ । पनौती नगरपालिका ३ का बिदुर सापकोटाको घर पहिरोले पुरिएको छ । काभ्रे जिल्लाको सडक सन्जाल ठप्प भएको छ ।
