२६ असार, काठमाडौं । झण्डै साढे ४ करोड ठगीको आरोपमा माई इन्भेस्टमेन्ट लिमिटेडका अध्यक्ष अनिल गजमेरलाइ प्रहरीले लाजिम्पाटबाट पक्राउ गरेकाे छ ।
समिर रिमालले ५४ लाख ठगीको गरेकाे भन्दै प्रहरीमा दर्जानौं उजुरी छ । राजेन्द्र महर्जनसहित ११९ जनाले ३ करोड ५५ लाख र सुरेन्द्रप्रसाद मास्केसहित ५ जनाले २२ लाख रुपैयाँ ठगी गरेको उजुरी दिएका थिए ।
बालुवाटारस्थित कालिका टावरमा माइ इन्भेष्टमेन्ट कम्पनी खोलेका उनले आफ्नो कम्पनीमा लगानी गरे २० देखि २५ प्रतिशतसम्म ब्याज रकम पाउने, शेयर र मुनाफा पनि छुट्टै दिने भनेर प्रलोभनमा देखाउँदै ठग्ने गरेको पीडित बताउँछन् ।
माई इन्भेस्टमेन्ट लिमिटेडको ०६७ सालदेखि कम्पनी ऐन र प्रचलित कानुन बमोजित गर्नु पर्ने साधारणसभा समेत भएको छैन । कम्पनीमार्फत उनले ४ सय जना व्यक्तिहरुलाई ठगी गरेको प्रहरीको प्रारम्भिक अनुसन्धानले देखाएको छ ।
राष्ट्र बैंकको इजाजत समेत नलिइ विभिन्न व्यक्तिसँग निक्षेप र कर्जा लिने काम गरेको पाइएको छ । उनीमाथि अनुसन्धान भइरहेको प्रहरीले जनाएको छ ।
