कैलाली, २४ असार । नेपाल कम्युनिस्ट पार्टीले भोली कर्णाली बन्दको घोषण गरेको छ । शान्तिपूर्ण कार्यक्रममाथि प्रहरीले हस्तक्षेप गरेर हवाई फायरिंग र नेता–कार्यकर्ता गिरफ्तार गरेको विरोधमा भोलि असार २५ गते सोमवार कर्णाली बन्दको घोषणा गरेको हो ।
पार्टीका कर्णाली ब्यूरो इन्चार्ज एटम बिसीले शुक्रबार एक विज्ञप्ति जारी गरेर बन्दको घोषणा गरेका छन् ।
कर्णालीका रुकुम (पश्चिम भाग), सल्यान, डोल्पा, जुम्ला, मुगु, हुम्ला,कालिकोट, जाजरकोट, दैलेख र सुर्खेत बन्द हुने उहाँले बताउनु भयाे ।पार्टीको ‘एकीकृत जनजागरण अभियान’ को सिलसिलमा आयोजना गरिएको शान्तिपूर्ण कार्यक्रममाथि प्रहरीले हस्तक्षेप गरेर सरकारले फासिवादी हरकत गरेको भन्दै त्यसको विरुद्ध बन्दको आह्वान गरेको इन्चार्ज बिसीले बताएका छन् ।
साँःकृतिक कार्यक्रम चलिरहेको बेला प्रहरीले हवाई फायर गर्नुको साथै अश्रुग्याँस प्रहार गरेको बिसीले बताए । प्रहरीले पार्टीका मुगु इन्चार्जसहित आधा दर्जन नेता–कार्यकर्तालाई गिरफ्तार गरेको छ ।
