काठमाडौं, असार २१ । बेलायतमा एक दम्पत्तिमाथि ‘नर्भ एजेन्ट’ बाट आक्रमण भएको छ ।
चार्ली रोली र डाउन स्ट्रगसमाथि स्नायु प्रणालीलाई प्रभावित पार्ने रसायन ‘नर्भ एजेन्ट’बाट आक्रमण भएको हो । उनीहरुलाई विल्टसरस्थित आफ्नो घरमा बेहोस अवस्थामा भेटिएको थियो ।
गम्भीर अवस्थामा फेला परेका उनीहरुलाई तत्काल अस्पतालमा भर्ना गरिएको छ ।
रुसी पूर्वजासुस सर्गेइ स्क्रिपाल र उनकी छोरी युलियाको हत्याको प्रयासका लागि प्रयोग भएको जस्तै ‘नर्भ एजेन्ट’ ती दम्पत्तिमा प्रयोग भएको बेलायती प्रहरीले जनाएको छ ।
बेलायती प्रहरीका प्रवक्ता नील बसुले रासायनिक हतियार विशेषज्ञले नै नर्भ एजेन्टको प्रयोग भएको पुष्टि गरेको जानकारी दिनुभयो ।
प्रहरीले यस्तो लक्ष्यण देखिएका अरु कोही पनि व्यक्ति अहिलेसम्म फेला नपरेको जनाएको छ । घाइते दम्पत्तिका बारेमा अहिलेसम्म थप केही जानकारी पाउन नसकेको पनि बताईएको छ ।
बेलायतका मुख्य चिकित्सा अधिकारी शैली डेविसले सामान्य व्यक्ति यसको चपेटामा पर्ने सम्भावना एकदम कम हुने बताउनु भयो ।
