काठमाडौं, असार १६ ।
नेपाल र भारतबीच रहेका सबै प्रकारका सन्धिसम्झौता पुनरावलोकन गरी सुझाव दिन गठित प्रबुद्ध व्यक्ति समुह ईपीजीको राजधानीमा जारी बैठक आज पनि बस्दै छ ।
आज सम्म चल्ने बैठकले हालसम्म भएका बैठकको प्रगतिलाई दुईपक्षीय साझा प्रतिवेदनको रुप दिदै सरकारलाई बुझाउने निर्णय गर्नेछ । भारतीय पक्षले केही विवादित विषयमा आफ्नो धारणा राख्ने क्रम अझै टुंगिएको छैन ।
सन् १९५० को मैत्रीसन्धि पुनरावलोकनको विषयलाई सम्बोधन गर्न पहल भइरहेको भए पनि केही बुँदा र नाममा अझै सहमति हुन सकेको छैन । आजको बैठकमा यसले अन्तिम रुप पाउने सम्भावना रहेको बताइएको छ ।
भारतीय पक्षको रायपछि नेपाली पक्षले छुट्टै बैठक बसेर भारतले राखेका केही विषयका बुँदामा के गर्ने भन्दै छलफल गरेको स्रोतले बताएको छ । भारतले राखेका केही गम्भीर विषयलाई लिएर उनीहरूले सरकारसँग समेत समन्वय गरेको जनाइएको छ ।
आतंकवाद, उग्रवाद र अवैध मुद्रा, लागूपदार्थ ओसारपसार, तस्करीलगायत नियन्त्रणका लागि दुवै पक्षलाई हित हुने गरी सीमा नियमन लगायत विषयमा भारतले दिएको जोडमा नेपालले समर्थन जनाएको छ ।
प्रधानमन्त्री केपी शर्मा ओलीको भारत भ्रमण लगत्तै दिल्लीमा ईपीजीको आठौं बैठक बसेको थियो । यहि असार २० मा ईपीजीको समय सीमा सकिदै छ । नेपाली पक्षको संयोजन डा भेषबहादुर थापा र भारतीय पक्षको भगत सिंह कोशीयारीले गरिरहनुभएको छ ।
