काठमाडौं, असार १४ । नेपाल वायु सेवा निगमले वाइड बडी ‘ए ३३०–२००’ सिरिजको विमान भित्र्याएको छ ।
आज बिहान त्रिभुवन अन्तर्रा्ष्ट्रिय विमानस्थलमा अवतरण गरेको नयाँ विमानलाई विमानस्थलमा संस्कृति, पर्यटन तथा नागरिक उड्ययन मन्त्रालय र निगमका अधिकारीहरुले स्वागत गरेका थिए । विमानको पूजासमेत गरिएको छ ।
निगमले नयाँ विमानलाई ‘अन्नपूर्ण’ नाम दिएको छ । निगमले युरोपेली कम्पनी एयरबसले उत्पादन गरेको जहाज अमेरिकाको एएआर कम्पनीसँग किनेको हो ।
विमानको लागत २१ अर्ब ९० करोड रूपैयाँ परेको छ । नयाँ जहाजमा विजनेश क्लासका १८ र इकोनोमी क्लासका २ सय ५६ सिट छन् ।
प्रत्येक सिटका अघि टचस्क्रिन सुविधासहितको स्मार्ट इन्फोटेन्मेन्ट सिस्टम राखिएको छ ।
जसमा नेपालीसहित विभिन्न भाषामा राखिएका गीत, संगीत तथा चलचित्र हेर्न सकिने व्यवस्था छ ।
यो विमान लिन नेपाल वायु सेवा निगमका महाप्रबन्धक सुगतरत्न कंसाकार, निगमका कर्पोरेट डाइरेक्टर रविन्द्र श्रेष्ठ र दुई जना नेपाली पाइलट फ्रान्स पुगेका थिए । तर, यो विमानलाई दुई जना विदेशी पाइलटले उडाएर ८ घण्टाको यात्रा तय गर्दै काठमाडौं ल्याएका हुन् ।
निगमले सरकारको जमानीमा सञ्चय कोष र नागरिक लगानी कोषबाट ऋण लिएर दुई वाइड बडी विमान खरिद गर्ने निर्णय गरेको थियो ।
अर्को वाइड बडी विमान पनि एक महिनाभित्रै आइपुग्ने निगमले जनाएको छ ।
निगमले आफ्नो नयाँ विमानलाई दुवई, हङकङ, दोहा, क्वालालाम्पुरलगायतका स्थानमा उडाउने तयारी गरिएको नेपाल वायु सेवा निगमका महाप्रवन्धक सुगतरत्न कंसाकारले जानकारी दिनुभयो ।
