१४ असार , धादिङ ।
अबिरल वर्षापछि गएको पहिरोमा पुरिएर उत्तरी धादिङको साईश्वाँरामा एकै परिवारका तीन जनाको मृत्यु भएको छ ।
खनियाबास गाउँपालिका वडा नं ५ साईश्वाँरामा पहिरोमा पुरिएर राजकुमार गुरुङका श्रीमती ३३ वर्षीय बसुदा गुरुङ, उनका छोरीहरू १० वर्षीय लक्ष्मी गुरुङ र ५ वर्षीय सरस्वती गुरुङको मृत्यु भएको हो ।
पहिरोमा परि राजकुमारका छोरा १२ वर्षीय विकास गुरुङ घाईते भएको धादिङका प्रमुख जिल्ला अधिकारी भागीरथ पाण्डेले जानकारी दिनुभयो ।
उनीहरुको किन्ताङफेदीमा रहेको स्वास्थ्य केन्द्रमा उपचार भइरहेको छ।
खनियाबास ४, चिउरीबोटमा पनि पहिरोका कारण दुई जना बेपत्ता भएका छन् । गोठमा सुतिरहेका ६५ वर्षीय शमशेर घले र उनका श्रीमती ६२ वर्षीय कोप्ची घले बेपत्ता भएका हुन् ।
उनीहरूको खोजी कार्य समेत भइरहेको धादिङका प्रहरी उपरीक्षक डम्बर विकले जानकारी दिनुभयो ।
पहिरोमा परि ४ जना घाईते भएका छन् । घाईतेहरुको किन्ताङफेदीमा उपचार भइरहेको जिल्ला प्रहरी कार्यालय धादिङले जानकारी दिएको छ ।
अविरल वर्षापछि जिल्लाको नेत्रावती गाउँपालिकास्थित सत्यदेवी, मार्पाकमा पनि पहिरोले घर बगाएको प्रहरीले जानकारी दिएको छ । वर्षापछि जिल्लाको उत्तरी क्षेत्रमा पहिरोको जोखिम बढेको छ । अघिल्ला वर्षहरूमा पनि उत्तरका बस्तीहरुमा पहिरोका कारण बस्ती नै जोखिममा परेका थिए ।
यसैगरी, नेत्रावती डपजोङ गाउँपालिकाको मार्पाकमा पाँच घर पहिरोले बगाएकोे छ । घटनास्थल सदरमुकामबाट एक दिनको पैदल दूरीमा पर्दछ । वर्षातका कारण जिल्लाको उत्तरी भेगतर्फ जाने सडक भत्किएकाले सदरमुकामबाट मोटर चल्न छाडेको छ । इलाका प्रहरी कार्यालय, दार्खाको प्रहरी टोली चिउरीखर्क पुगिसकेको छ भने साईश्वाँरा भने अझै पुग्न सकेको छैन ।
घटनाको थप विवरण आउन बाँकी रहेको र घटनास्थलमा जतिसक्दो छिटो प्रहरी पठाउने तयारी भइरहेको जिल्ला प्रहरी कार्यालय धादिङले जनाएको छ ।
