प्रकाश डुम्रे/१३ असार,बुटवल ।
नेपाल कम्युनिस्ट पार्टीले कृत्रिम अभाव सिर्जना गरेर कालोबजारी गर्ने पेट्रोल पम्प सञ्चालनहरुलाई कावारही गर्ने चेतावनी दिएको छ ।
नेकपाले समानान्तर सत्ताको रुपमा गठन गरेको जनपरिषद्ले पेट्रोलियम व्यवसायीले योजनाबद्ध रुपमा नाफा र कमिशन कमाउने उद्देश्यले कृत्रिम अभाव सिर्जना गरेर कालोबजारी गर्दै आएकोले त्यस्ता व्यवसायीलाई कार्वाहि गर्ने चेतावनी दिएको हो ।
अवध स्वायत्त प्रदेश अन्तरगत कपिलवस्तु जनपरिषदले विज्ञप्ति जारी गर्दै कमिसन खाएर रातारात करोडपति बन्ने सपना देखेर जनतालाई दुःख दिने कार्य रोक्न चेतावनी दिएको छ । जनपरिषद प्रमुख शंखप्रसादको हस्ताक्षर रहेको बिज्ञप्तीमा व्यवसायीले गलत कार्य तत्काल नरोके जनकारवाही गर्ने उल्लेख छ ।
कपिलवस्तु जिल्लामा सोहि क्षेत्रका दलालहरुको मिलेमतोमा पेट्रोल पम्पहरुमा कृतिम रुपमा पेट्रोलियम पदार्थको अभाव बनाई आम नागरिकलाई दुःख दिने काम गरिरहको भन्दै उहाँले यस्तो कार्य तत्काल रोक्न माग गर्नुभएको छ ।
यस्तै स्थानीय निकायमा असारे बजेट सक्न जथाभावी बजेट खर्चेर ठेकदार र कर्मचारीको मिलेमत्तोमा अनियमितता बढाउँदै लगेको भन्दै उक्त कार्यप्रति पनि जनपरिषद्ले ध्यानाकर्षण भएको समेत बताएको छ ।
जनताको ढाड सेक्ने गरि दैनिक उपभोग्य समानमा बढेको महङ्गि तत्काल रोक्न पनि सरकार सँग माग गरेको छ ।
