काठमाडौ, असार १३ ।
पुरानै स्वरुपमा तयारी पारिएको १ सय १० वर्ष पुरानो गद्दी बैठक आज सरकारलाई औपचारिक रुपमा हस्तान्तरण गरिदै छ ।
२०७२ वैशाख १२ गतेको भूकम्पले क्षतिग्रस्त भएको हनुमानढोका दरबार परिसरमा रहेको गद्दी बैठकको पुनर्निर्माण सम्पन्न भएसँगै आज सरकारलाई हस्तान्तरण गर्न लागिएको हो ।
प्रधानमन्त्री केपी शर्मा ओलीको उपस्थितिमा हस्तान्तरण हुन लागेको उक्त गद्दी बैठक सांस्कृतिक सम्पदा पुनर्निर्माणको ठूलो परियोजना मध्येको एक हो ।
‘रेट्रोफिटिङ’ गरेर पुरानै स्वरुपमा बैठक कक्षको आवरण तथा भित्री स्वरुप निर्माण गरिएको छ । ’मियामोटो ग्लोबल डिजास्टर रिलिफ’को प्राविधिक सहयोगमा गद्दी बैठक पुनर्निर्माण भएको हो ।
पुनर्निर्माणको आर्थिक सहायता भने अमेरिकी दूतावासको संस्कृति संरक्षण कोषले गरेको हो । गद्दी बैठक पुनर्निर्माण सन् २०१७ को अक्टोबरमा सुरु गरिएको थियो ।
