ब्रसेल्स, असार ९ ।
आप्रवासी संकटबारे छलफल गर्न १६ युरोपेली राष्ट्रका नेताहरुले ब्रसेल्समा हुने शिखर सम्मेलनमा भाग लिने भएका छन् । युरोपेली संघ (इयू) का १६ मुलुकका नेताले आइतबार हुने शिखर सम्मेलनमा भाग लिने संकेत गरेका हुन् ।
यूरोपेली आयोगका प्रमुख जाँ क्लाउड जंकरले आप्रवासी संकटबारे शुरुमा आठ मुलुकबीच छलफल गरेको जानकारी दिदैँ अहिले १६ वटा मुलुक अनौपचारिक छलफल गर्न तयार रहेको बताउनु भयो ।
इयू सदस्य राष्ट्रमध्ये सबैभन्दा आप्रबासीका कारण ग्रीस र इटालीमाथि भार परिरहेका छ ।
शुरुमा बेल्जियम, नेदरल्याण्ड, क्रोएसिया, स्लोभानिया, डेनमार्क, फिनल्याण्ड, स्वीडेन र लक्जेम्वर्गबीच कुराकानी भईसकेको र अब अन्य मुलुकसँग छलफल हुने उहाँको भनाइ थियो ।
जर्मन चान्सलर एन्गेला मर्केल, फ्रान्सका राष्ट्रपति इमानुयल म्याक्रों, स्पेनी प्रधानमन्त्री पेड्रो साञ्चेज, माल्टाली प्रधानमन्त्री जोसेफ मस्कटले यस पहिले नै सम्मेलनमा सहभागिता हुने जनाएको अधिकारीहरूले बताएका छन् । सम्मेलनमा इटाली र ग्रीस पनि सहभागी हुने बताइएको छ ।
तर, हंगेरी, पोल्याण्ड, चेक रिपब्लिक र स्लोभाकियाजस्ता आप्रबासी समस्याबारे विरोधी मानिने मुलुकले सम्मेलनमा सहभागिता नजनाउने बताइसकेका छन् ।
