पोखरा, असार ७ ।
पोखरा लेखनाथ महानरपालिकाको नाम लामो भएको भन्दै परिवर्तन गर्ने तयारी गरिएको छ ।
महानगरपालिकाले असार १० गतेबाट शुरु हुने नगरसभा मार्फत लेखानाथ शब्द हटाएर पोखरा महानगरपालीका मात्रै राख्ने तयारी गरिएको हो ।
पोखरा लेखनाथ महानगरपालिका नाम लामो हुनुका साथै छोटकारीमा भन्दा पनि नराम्रो सुनिने र अन्तर्रा्ष्ट्रिय ख्याति प्राप्त नाम भएकाले पोखरा मात्रै राख्ने सुझाव अनुसार नै हटाउन लागिएको जनाईएको छ ।
साविकको लेखनाथ नगरपालिकामा पर्ने २६ देखि ३३ वडा सम्मका सबै वडाध्यक्षहरु नाम परिवर्तन गर्न सहमत भएकोले आगामी नगरसभामा नाम फेर्ने प्रस्ताव गरेर पारित गर्ने योजना महानगरपालिकाले बनाएको छ ।
यसअघिको नगरसभामै नाम फेर्न अधिकांश सभा सदस्य सहमत भएपनि मेयर मानबहादुर जिसीले निर्णय गराउन सक्नुभएको थिएन ।
मेयर जिसीले नाम फेर्ने प्रस्तावमा अधिकांशको सहमती भएपनि बिरोध गर्नेहरुका कारण पोखरावासीमा नकरात्मक प्रभाव पर्न सक्ने भएकाले तत्काल निर्णय नगरिएको बताउनु भयो ।
उहाँले अब भने लेखनाथ हटाएर पोखरा महानगरपालीका मात्रै राख्ने पनि प्रष्ठ पार्नुभयो ।
उता केही लेखनाथवासीहरुले भने महानगरको नामबाट लेखनाथ हटाउँदा साविकको लेखनाथको अस्तित्व नै नरहने चिन्ता समेत व्यक्त गरेका छन् ।
