५ असार,दाङ । आफैले भोट दिएर जिताएका जनप्रतिनिधिको ठाडो निर्देशनमा वषौंदेखि बस्दै आएको ४२ घरपरिवारमाथि डोजर लगाइएको छ ।
दाङको तुलसीपुर–१२ हरपौरीमा बस्दै आएका उनीहरुको बिना विकल्प उठिबास लगाइएको छ । विगत ४० वर्ष पहिलेदेखि जोतभोगसहित बसोबास गर्दै आएका सुकुम्बासीको स्थानीय जनप्रतिनिधिकै ठाडो निर्देशनमा उठिबास लगाइएको बताइएको छ ।
श्री पशुपति मावि हरपौरी विद्यालयले पहिले आफैले उक्त जग्गामा बस्न दिएर अहिले अरुलाई नै भाडामा दिन तुलसीपुर उपनगरपालिकाले किसानहरुमाथि डोजर लगाएको हो । उक्त ठाउँमा बसोबास गर्दै आइरहेको ४२ घरपरिवारले केहिदिन अघि सरोकारवाला सबै निकायहरुसँग र तुलसीपुर उपमहानगरपलिकासँग आफूहरुको बासस्थानको व्यवस्थाको अर्को पहलको लागि निवेदन पेश गरेका भएपनि कुनै व्यवस्थाविना नै जबरजस्ती डोजर लगाइदिरहेको स्थानीयले बताएका छन् ।
उनीहरू भन्छन्, चुनावमा भाेट माग्न हात जाेड्दै अाउछन् अनी जितेपछि घरबार नै उठाइदिन्छन्र । यीनीहरूले जनताका लागि हरैन अाफ्नै लागि मात्र काम गर्छन् ।
तुलसीपुर उपमहानगरपालिकाका मेयर घनश्याम पाण्डेले समेत वडा र विद्यालय व्यवस्थापन समितिमा छलफल गरेर मात्रै उठाउन भनेर तोक लगाएपनि उपमहानगरपालिकाको डोजर लगाएर आफूहरुको उठिबास लगाउन खोजिएको पीडितहरु बताउँछन् । केही जनप्रतिनिधिहरु र विद्यालय व्यवस्थापन मिलेर सुकुम्बासीको उठिबास लगाउने लागेको बताइएको छ ।
वर्षौदेखि बसोबास गरिरहेका किसानहरुको विना बिकल्प उठिबास लगाउन लागिएको भन्दै नेपाल कम्युनिस्ट पार्टी दाङले आपत्ति जनाएको छ । विप्लव नेतृत्वको नेकपाले जबरजस्ती डोजर नलगाउन पनि चेतावनी दिएको छ ।
