१ असार, पोखरा । पोखराको फिर्के खोलामा पैदल मार्ग (फुट ट्रयाक) उद्घाटनको क्रममा अाज अचानक डोजर चल्दा पत्रकारसहित ५ जना घाइते भएका छन् । डोजर चलेर फिर्केको रेलिङलाई धक्का दिँदा पत्रकार सन्देश श्रेष्ठ र रञ्जन अधिकारी सहित ५ जना घाइते भएका छन् ।
पोखरा लेखनाथ महानगरपालिकाका मेयर मानबहादुर जिसीले डोजर चलाएर उक्त फुट ट्रयाकको उद्घाटन गर्ने कार्यक्रम रहेकेामा प्रमुख जिसी डोजरमा चढ्नुभएकाे थियाे तर अचानक डाेजर चलेर खोलामा रहेको रेलिङमा ठाेक्किदा फाेटाे खिच्न तयारी भएर बसेका पत्रकार सहित ५ जना खाेलामा खेसेका हुन् ।
खोलामा खस्नेहरुमा पत्रकारहरुसँगै पोखरा लेखनाथ महानगरपालिका ८ बाट उद्घाटन हेर्न आएकी प्रगती आमा समूहकी गौरी पौडेललगायत छन् । खोलामा खस्नेमध्ये पौडेललाई सबैभन्दा बढी चोट लागेको छ । उनको दाहिने खुट्टाको कम्मर मुनिको भाग, देब्रे खुट्टाको घुँडा मुनि र कोखामा चोट लागेको छ ।
पत्रकार रञ्जन अधिकारीको हात, खुट्टा र निधारमा चोट लागेको छ भने सन्देश श्रेष्ठको दाहिने हातको कुहिनामा सामान्य चोट लागेको छ । उनीहरुको मेट्रोसिटी अस्पताल पोखरामा उपचार गरिएको छ ।
पोखराको बीच भाग भएर बग्ने फिर्के खोलामा पैदल मार्ग (फुट ट्रयाक) निर्माण शुरु भएको छ । पोखरा लेखनाथ महानगरपालिकाको १ करोडको लागतमा फिर्के खोलाको दुबैतर्फ फुट ट्रयाक खोल्न लागिएको हो ।
पोखरा लेखनाथ महानगरपालिका ५ मा पर्ने सिद्धार्थचोक र पर्स्याङचोकको बीचमा रहेको फिर्के खोलाको किनारमा ट्रयाक खोल्न लागिएको हो । फिर्के खोलाको ६ किलोमिटर क्षेत्रफलमा फुट ट्रयाक बनाइने पोखरा लेखनाथ महानगरपालिका ५ का वडाध्यक्ष डिबी नेपालीले जानकारी दिनुभयाे ।
