वीरेन्द्रनगर, २७ जेठ । चिंगाड गाउँपालिका–४ मटेलाको प्राथमिक विद्यालय धनापानीमा पढिरहेका विद्यार्थीमाथि चट्याङ्ग पर्दा दुईजनाको मृत्यु भएकोे छ । अन्य सातजना घाइते भएका छन् ।
आइतबार बिहान ११ बजेतिर कक्षामा दोस्रो विषय अध्ययन गरिरहेकै अवस्थामा तीव्र वर्षासँगै परेको चट्याङ्गबाट मेटलाका ७ वर्षीय अम्बरबहादुर चन्द र अर्की ७ वर्षीया निर्मला चन्दको मृत्यु भएको हो ।
कक्षामा पढाइरहेका बेला टिनको छानमाथि एक्कासी चट्याङ्ग परेपछि दुईजनाको घटनास्थलमै मृत्यु भएको स्थानीय समाजसेवी डोरप्रसाद शर्माले जानकारी दिए ।
चट्याङ्गबाट घाइते सातमध्ये पाँचजनाको मटेला स्वास्थ्य चौकीमै सामान्य उपचारपछि घर फर्काइएको छ भने, दुईजनाको उपचार भइरहेको छ । कक्षा दुईमा अध्ययनरत ६ वर्षका निर्मल चन्द र पाँच वर्षीया पवित्रा शाहीको उपचार भइरहेको जिल्ला प्रहरी कार्यालय सुर्खेतले जनाएको छ । चट्याङ्गबाट विद्यालयमा समेत क्षति पुगेको छ ।
