२५ जेठ, काठमाडौं ।सुन तस्करी प्रकरणमा मुख्य लगानीकर्ता भनिएका एमके भनिने मोहनकुमार अग्रवालको घरबाट छापा मारेर प्रहरीले ३० लाख रूपैयाँ नगद, दुई किलो चाँदी र १० तोला सुन बरामद गरेको स्रोतले जनाएको छ ।
करिब ३८ क्वीन्टल सुन तस्करी प्रकरणमा मुख्य लगानीकर्ता भनिएका अग्रवालको अनामनगरस्थित घरमा प्रहरीले छापा मारेको छ ।
सुन तस्करी प्रकरणको अनुसन्धान थाले लगत्तै घरमा ताला लगाएर फरार भएका अग्रवाल भारतमा लुकेर बसेको आशंका गरिएको छ ।
शुक्रबार प्रकरणको अनुसन्धान गर्न गठित विशेष अनुसन्धान समितिले उनको घरमा छापा मारेर ३० लाख रूपैयाँ नगद, दुई किलो चाँदी र १० तोला सुन बरामद गरेको स्रोतले जनाएको छ ।
घरमा भएको अन्य सुन अग्रवाल पत्नी निलमले लिएर कतै लुकेर बसेको हुन सक्ने प्रहरीको अनुमान छ । ‘सुन राख्ने खाली डिब्बा र सुन बोक्ने ज्याकेट चाहिँ फेला पारेका छौं’, समिति स्रोतले भन्यो ।
प्रहरीले बा १० च २८२ नम्बरको गाडीसहित अन्य केही महत्वपूर्ण कागजातहरु बरामद गरेको दाबी गरेको छ ।onlinekhabar
