काठमाडौँ जेष्ठ २४ ।
नेपाल आयल निगमका कार्यकारी निर्देशक गोपाल खड्काले राजीनामा दिनुभएको छ । उहाले आज उद्योग वाणिज्य तथा आपूर्ति मन्त्रालय सिंहदरबारमा पत्रकार सम्मेलन गर्दै आजकै मितिबाट लागु हुने गरी राजीनामा दिएको बताउनु भएको हो ।
उहाले आफूलाई गत कात्तिकमा मन्त्रालयमा तानेर जिम्मेवारीबिहीन बनाएकोले यो पदमा बसिरहन उपयुक्त नभएको बताउनु भएको छ । उहाले आजै आपूर्ति मन्त्री मातृका यादवलाई राजीनामा पत्र बुझाउनु भएको छ ।
आयल निगममा हुँदा व्यापक अनियमितता गरेको आरोप लागेका खड्कालाई लागेको थियो ।
उहालाई इन्धन भण्डारणको लागि जग्गा खरिद गर्दा अनियमितताको आरोप लागेकाले निगममै राख्दा निगमको हित विपरित कार्य गर्न सक्ने भन्दै आपूर्ति मन्त्रालयले मन्त्रालयमा हाजिर गराउने निर्णय शेरबहादुर देउवा नेतृत्वको सरकारले गरेको थियो । उहाको अझै ६ महिनाको कार्यकाल बाँकी नै थियो ।
यसैबिच उद्योग, वाणिज्य तथा आपुर्तिमन्त्री मात्रिका यादवले नेपाल आयल निगमका तत्कालिन कार्यकारी निर्देशक गोपाल खड्काले राजीनामा दिएकोमा धन्यवाद दिनुभएको छ ।
आज मन्त्रालयमा आयोजित पत्रकार सम्मेलनमा मन्त्री यादवले खड्कालाई ‘मन्त्रालयलाई काम गर्न सहज वातावरण बनाइदिएको भन्दै धन्यवाद दिनुभएको हो ।
मन्त्री यादवले नेपाल आयल निगममा नयाँ नियुक्तिका लागि छलफल थाल्ने पनि बताउनु भयो । उहाले निगममा अब नयाँ नियुक्ति गर्दा प्रतिस्पर्धाका आधारमा गरिने भन्दै निगमलाई सुधारेर लैजाने दावी समेत गर्नुभएको छ ।
