धनगढी, जेठ २१ ।
एक साताअघि कैलालीको धनगढी उपहानगरपालिका–१ मेन रोडमा गोली हानेर ९ लाख रुपैयाँ लुट्ने समूहका योजनाकार राजधानीबाट पक्राउ परेका छन् ।
पक्राउ पर्नेमा कञ्चनपुरको कृष्णपुर–९, पिपरियाका २३ वर्षीय कल्लु भनिने कालु राना, धनगढी उपमहानगरपालिका–१३, का २८ वर्षीय राम प्रवेश राना रहेको प्रहरीले जानकारी दिएको छ ।
उनीहरुलाई महानगरीय अपराध महाशाखाको टोलीले आज विहान राजधानीको गोंगबु क्षेत्रबाट पक्राउ गरेको महाशाखाका प्रमुख प्रहरी वरिष्ठ उपरीक्षक (एसएसपी) धिरजप्रताप सिंहले जानकारी दिनुभयो ।
सिंहका अनुसार राना घटनाका मुख्य योजनाकार हुन् । यसअघि गत जेठ १३ मा पनि आईएमईबाट रकम लिएर बैंकमा जम्मा गर्न जाने क्रममा धनगढी–३ का ३७ वर्षीय निर्मल कार्कीमाथि गोली प्रहार भएको थियो ।
बा ४० प ४४३८ नम्बरको मोटरसाइकलमा आएका उनीहरूले गोली प्रहार रकम लुटेर भागेका थिए । यसअघि पनि जबरजस्ती करणी मुद्धामा सजाय पाएका कल्लुले गोली प्रहार गरि लुटेको स्वीकार गरेका छन् ।
यसैबीच दुर्लभ वन्यजन्तु गैडाको खाग बिक्री गरिरहेको अवस्थामा प्रहरीले एक जनलाई पक्राउ गरेको छ । महानगरीय प्रहरी बृत लौनचोरबाट खटिएको टोलीले विशेष सूचनाको आधारमा धादिङ बेनिटारका जिसन सुनुवारलाई पक्राउ गरेको हो ।
बरामद भएको खाग ६५ लाख रुपैयाँमा बिक्री गर्न लागेको प्रहरी अनुसन्धानमा खुलेको छ । घटनाको थप अनुसन्धान भइरहेको प्रहरीले जनाएको छ ।
